Úsharalda shekarashy avıatorlardyń oqý-jattyǵýy ótti
ASTANA. QazAqparat - Úsharal avıatsııalyq eskadrılıasynyń bazasynda bir jaqty ushý-taktıkalyq jattyǵýy bolyp ótti, dep habarlaıdy QR UQK ShQ baspasóz qyzmeti.
Oqý-jattyǵý aıasynda avıatorlar Úsharal - Aqtoǵaı - Úsharal baǵytynda 300 shaqyrymdyq avtomobıldi marshqa shyǵyp, onyń barysynda baılanys júıesindegi kedergilerdi joıý, lagerge shartty shabýyldy oryndaý, tehnıkalyq jáne tyldyq qamtamasyz etýdi uıymdastyrý sekildi tapsyrmalardy atqardy.
«Qyzylaǵash» avıatsııalyq polıgonynda 4 birdeı tikushaqtyń kómegimen avıatsııalyq zeńbirekterdi, avıatsııalyq bombalardy, basqarylatyn avıatsııalyq raketalar men pýlemetterdi qoldaný arqyly naqty tapsyrmalar oryndaldy.
Sondaı-aq «Qyzylaǵash» polıgonynda QR QM 21751 «Jetisý barysy» áskerı bólimimen ózara birlesken is-qımyl tapsyrmalary oryndaldy.
Úsharal eskadrılıasy qazaq-qytaı shekarasyndaǵy birneshe otrıadtardy avıatsııalyq jaǵynan qamtamasyz etedi.
Eskadrılıa qyzmet atqaryp kele jatqan ýaqyttan beri onyń ekıpajdary 50000 saǵattyq ushý jumysyn oryndady. Ushqyshtar Aýǵanstandaǵy áskerı is-sharalar kezinde batyldyq pen batyrlyq úlgisin kórsete bildi.
Ushqyshtar quramy barlyq shekaralyq is-sharalarǵa, lańkestikke qarsy oqý-jattyǵýlarǵa belsendilikpen qatysyp keledi.
Shekarashy ushqyshtar memlekettik shekarany qorǵaýdan basqa qıyn jaǵdaıǵa tap bolǵandardy qutqarý is-sharalaryna da qatysýda.
