Úsh jylda balalar quqyǵyn qorǵaýǵa arnalǵan 11 zań qabyldandy
ASTANA. KAZINFORM — Vıtse-Prezıdent BUU Bas hatshysynyń arnaıy ókilimen kezdesti. Bul týraly Aqordanyń baspasóz qyzmeti habarlady.
Vıtse-Prezıdent Erlan Qarın BUU Bas hatshysynyń balalar máseleleri jónindegi arnaıy ókili Nadjat Maalla Mdjıdpen kezdesti.
Kezdesýde balalardyń quqyqtaryn qorǵaý, olarǵa qatysty zorlyq-zombylyqtyń aldyn alý, óskeleń urpaqtyń ál-aýqatyn qamtamasyz etý máseleleri baǵytyndaǵy yntymaqtastyqty damytý jaıy talqylandy.
Erlan Qarın balalardyń ál-aýqaty men qaýipsizdigin qamtamasyz etý Memleket basshysynyń strategııalyq baǵdarynyń basym baǵyttarynyń biri ekenin atap ótti.
Vıtse-Prezıdent balalardyń quqyqtaryn qorǵaý jáne olardyń jan-jaqty damýyna jaǵdaı jasaý maqsatynda qabyldanǵan zańnamalyq jáne áleýmettik sharalar týraly málimet berdi.
Keıingi 3 jylda Qazaqstanda balalardyń quqyqtary men múddelerin qamtamasyz etýge baǵyttalǵan 11 zań qabyldandy. Sonymen qatar Memleket basshysynyń tapsyrmasy boıynsha erekshe qajettilikteri bar balalardy keshendi qoldaý jáne aqparattyq-tsıfrlyq qaýipsizdikti qamtamasyz etý jónindegi jańadan 2 zań jobasy ázirlendi.
Prezıdent tapsyrmasy boıynsha 2026-2030 jyldarǵa arnalǵan «Qazaqstan balalary» tujyrymdamasy ázirlenip, iske asyrylýda.
2024 jylmen salystyrǵanda balalarǵa qatysty asa aýyr qylmystar sany 45%-ǵa, al olardy jynystyq qatynasqa túsýge májbúrleý qylmystarynyń sany 10%-ǵa azaıǵanyna nazar aýdaryldy. Sonymen qatar kámeletke tolmaǵandar tarapynan jasalatyn qylmystar da 10%-ǵa azaıǵan. Vıtse-Prezıdent balalardyń quqyǵyn qorǵaý, qaýipsizdigin nyǵaıtý baǵytyndaǵy júıeli jumystar jalǵasa beretinin aıtty.
Budan bólek, Erlan Qarın Prezıdenttiń «Ulttyq qor – balalarǵa» baǵdarlamasynyń júzege asyrylý barysyna toqtaldy. Baǵdarlama aıasynda sońǵy 3 jylda 7 mıllıonnan astam balaǵa 2,5 mlrd dollardan astam qarajat aýdaryldy.
Sondaı-aq Vıtse-Prezıdent Memleket basshysy Qasym-Jomart Toqaev reformalarynyń strategııalyq baǵytyn iske asyrý máselelerine toqtaldy. Osy rette jańa Konstıtýtsııanyń otbasy men balalyq shaqty qorǵaýdaǵy, adamı kapıtaldy damytýdaǵy mańyzyna nazar aýdaryldy. Óskeleń urpaq tárbıesindegi konstıtýtsııalyq qundylyqtardyń róline erekshe mán berildi.
Nadjat Maalla Mdjıd Qazaqstanda balalardy qorǵaý júıesin nyǵaıtýǵa baǵyttalǵan reformalarǵa joǵary baǵa berdi.
Sonymen qatar basqosýǵa BUU-nyń Qazaqstandaǵy Turaqty úılestirýshisi Sarango Radnaragcha jáne ıÝNISEF-tiń Qazaqstandaǵy ókili Rashed Mustafa Sarvar da qatysty.
