Úsh qalada salynatyn JEO-lar qaı jyly paıdalanýǵa beriledi

ASTANA. KAZINFORM — Energetıka mınıstrligi úsh qalada salynatyn jylý elektr ortalyqtary Qazaqstannyń teńgeriminde bolatynyn málim etti.

- Qazirgi kezde Kókshetaý, Semeı, Óskemen qalalarynda 2032 jylǵa deıin kezeń-kezeńimen paıdalanýǵa beriletin úsh jylý elektr ortalyǵyn salý boıynsha jobalar iske asyrylyp jatyr. Sonymen qatar bul JEO-lar «Samuryq-Energo» AQ jáne «Samuryq-Qazyna» AQ enshiles kompanııalarynyń menshiginde bolatynyn habarlaımyz, - delingen mınıstrliktiń Kazinform agenttigine bergen jaýabynda.

Vedomstvo aqparaty boıynsha Kókshetaýdaǵy ortalyq 2029 jyly, Óskemendegi ortalyq 2031 jyly, al Semeıdegi ortalyq 2032 jyly tolyq paıdalanýǵa beriledi.  

Eske salsaq, 2024 jyly sáýirde Qazaqstan Respýblıkasy men Reseı Federatsııasynyń energetıka mınıstrlikteri arasynda Kókshetaý, Semeı jáne Óskemen qalalarynda JEO salý jobalary boıynsha yntymaqtastyq týraly kelisimge qol qoıyldy.

Al 10 qyrkúıekte Kókshetaý JEO qurylysy bastalatyny habarlandy.

Premer-Mınıstrdiń birinshi orynbasary Roman Sklıar Qazaqstanda salynatyn úsh jylý elektr ortalyǵynyń qurylysyna qarajat qaıdan bólinetinin túsindirdi.