Úrimji marafonynda qandastarymyz top jardy
ASTANA. KAZINFORM — 31 tamyz kúni Qytaıdyń Úrimji qalasynda ótken jartylaı marafonda úsh birdeı qandasymyz top jardy,-dep habarlaıdy Kazinform tilshisi Sınhýa agenttigine silteme jasap.
Belgili bolǵandaı, Sanjy ınstıtýtynyń stýdenti, birinshi razrıadty sportshy Eren Eleýsiz máre syzyǵyn 1 saǵat 6 mınýt 54 sekýndta kesip ótip, jeńis tuǵyryna kóterildi. Onyń izinshe Qazez Bektursyn men Turábil Tóleýhan da kómbege jetip, kúmis jáne qola medaldardy ıelendi.
Búgingi dúbirli dodada tolyq marafon, jartylaı marafon jáne 6 shaqyrymdyq qyzyqty marafon sanattary boıynsha júldeler tigilip, jalpy 14 myń adam jarysqa túsken.
Jarys joly Úrimji qalasynyń birneshe aýdanyn basyp ótetin saltanatty sharaǵa alys-jýyq shetelderden de jelaıaq júırikter shaqyrylǵan. Erler arasyndaǵy marafonnyń bas júldesin dáriger-sportshy Lı Chjenıýe qanjyǵasyna baılansa, kúmis pen qola qandastarymyz Dosbol Qabyljan men Baqtııar Orazalyǵa buıyrdy.
Aqparat kózinen belgili bolǵandaı, Eren Eleýsiz — keıingi kezde búkil Qytaıǵa tanymal bola bastaǵan marafonshy. Ol ótken jyly Turfan jáne Chjýchjoý marafondarynda top jarsa, bıyl Manshı jáne Lotıan jartylaı marafondarynda kúmisten alqa taqqan bolatyn.
