Úndistan sońǵy jeti jylda alǵash ret Iran munaıyn satyp aldy

ASTANA. KAZINFORM — Úndistannyń Munaı jáne tabıǵı gaz mınıstrligi AQSh pen Izraıldiń Islam Respýblıkasyna qarsy soǵysy saldarynan týyndaǵan jahandyq energetıkalyq daǵdarysqa baılanysty Iran munaıyn satyp alýdy qaıta bastaǵanyn málimdedi, dep habarlaıdy DW.

Úndistan Ormýz buǵazynyń qorshaýy men AQSh jáne Izraıldiń Iranmen soǵysy jaǵdaıynda Iran munaıyn satyp alýdy qaıta bastady. Bul týraly eldiń Munaı jáne tabıǵı gaz mınıstrligi senbi kúni áleýmettik jelide habarlady.

— Taıaý Shyǵystan munaı jetkizýde úzilister bolǵandyqtan, Úndistan munaı óńdeý zaýyttary qajetti shıkizatty Irannan da aldy, — delingen departament málimdemesinde.

Mınıstrlik sondaı-aq tólem máselesine baılanysty ırandyq munaı tankeriniń Úndistannan Qytaıǵa burylǵany týraly aqparatty joqqa shyǵardy.

Qaýesetterge qaramastan, ırandyq munaı ımporty úshin eshqandaı tólem kedergileri kezdespedi. Sonymen qatar, mınıstrlik Irannan 44 myń tonna suıytylǵan tabıǵı gaz (STG) alǵanyn habarlady.

Reuters atap ótkendeı, Irannan Úndistanǵa munaı jetkizý AQSh-tyń Tegeranǵa qarsy sanktsııalaryna baılanysty 2019 jyly toqtatyldy.

20 naýryzda Donald Tramp ákimshiligi Iran munaıyn 30 kún boıy teńizde satyp alýdy shekteıtin sanktsııalardy alyp tastady. CNN aqparat kózi atap ótkendeı, Vashıngton mundaı qadamǵa energetıkalyq daǵdarystyń áserin azaıtý úshin negizgi tetikteri taýsylǵan soń barǵan. 

Atap aıtqanda, Úndistan 5 naýryzǵa deıin tankerlerge tıelgen reseılik munaıdy satyp alýǵa ýaqytsha lıtsenzııa aldy. Lıtsenzııa tek Úndistanǵa baratyn kemelerge, sondaı-aq úndi kompanııalary satyp alǵan munaıǵa qatysty. AQSh-tyń Úndistanǵa Reseıden munaı satyp alý lıtsenzııasynyń merzimi 4 sáýirde aıaqtaldy.

Aıta keteıik, Donald Tramp Ormýz buǵazyn 48 saǵattyń ishinde ashýdy talap etti.