Ulybrıtanııada azyq-túlik baǵasy aspandap tur

LONDON. QazAqparat - Ulybrıtanııada azyq-túlik ónimderi 16,8%-ǵa qymbattap, 46 jyldan beri bolmaǵan maksımýmǵa jetti. Janar-jaǵarmaı arzandaǵanymen, sút, irimshik jáne jumyrtqa sııaqty halyq kóp tutynatyn azyq-túlik ónimderiniń baǵasy aspandap tur. Buǵan qosa meıramhana, qonaq úı qyzmeti men áýe bıletteri sharyqtaǵan, dep habarlaıdy QazAqparat tilshisi.

Máselen, sút ótken jylmen salystyrǵanda 50%-ǵa ósken. Makaron ónimderi jáne qanttyń da quny qarasha halyqtyń qaltasyna batyp otyr.

Kedeıshiliktiń qamytyn kıgender fýdbanktiń kómegine júginýge májbúr. Fýdbank - aılyǵy shaılyǵyna jetpeıtinderge tamaqty aptasyna bir ret tegin taratatyn jer.

Barlyǵy demeýshilerdiń esebinen. Qaıyrymdylyq ortalyǵyna dúkender azyq-túlikpen kómektesse, kásipkerler aqshalaı qoldaıdy.

Ómir súrý quny qymbattaǵan tusta fýdbanktiń kómegine júginetinderdiń qatary tipti kóbeıgen. Kópbalaly, jalǵyzbasty ana Donna Heı osy ortalyqtyń arqasynda ǵana jan baǵyp otyrǵanyn aıtady.

«Túnde balalarym ash jatty. Jaryq pen gazdyń, jaldamaly páter aqysyn da tóleı almaı júrmin», deıdi ol.

Londonnyń Haknı aýdanynda ornalasqan fýdbank osydan 6 jyl buryn tabysy tómen otbasylarǵa tamaqpen kómektesý úshin aıyna 2000 fýnt jumsasa, qazir aptasyna 4000 jumsaıdy.

Ortalyq tyǵyryqtan shyǵý úshin aldaǵy ýaqytta 100 000 fýnt kóleminde qarjy qoryn jınaýǵa úmitti.

«Keı otbasylar jaryq pen jylýdy únemdeý úshin jylytý peshi men gazdy sóndirip qoıýǵa májbúr. Bizdiń bergen tamaǵymyzdy olar pisirip, jeı de almaıdy», deıdi qaıyrymdylyq ortaǵynyń ókili Met Fıttsımons.

Ulybrıtanııa premer-mınıstri Rıshı Sýnak ınflıatsııa deńgeıin osy jyly eki esege deıin tómendetip, ekonomıkanyń ósimin qamtamasyz etýge ýáde berip otyr.

Úkimet basshysy sózinde turmasa, bılikpen qosh aıtysýyna týra keledi. Óıtkeni keler jyly jalpy saılaý ótip, el tizginin oppozıtsııalyq partııa ustaýy múmkin.

«Inflıatsııa deńgeıiniń tómendeýi ózdiginen bolatyn protsess emes. Biz jasaǵan josparǵa sáıkes áreket etkennen keıin ǵana júzege asady. Nátıjege jetý úshin kúzgi málimdememizdi ustanamyz jáne úkimet bar kúsh-jigerin salady», deıdi Premer-mınıstr Rıshı Sýnak.

Sýnak el ekonomıkasyn damytyp, jalaqysy joǵary jumys oryndaryn ashamyn dep ant-sý ishkenimen nátıje qandaı bolary belgisiz.

Bıýdjettik jaýapkershilik basqarmasynyń boljamyna sáıkes bıylǵy jyldyń sońǵy toqsanynda tutyný baǵalary ındeksiniń ınflıatsııasy shamamen 4%-ke deıin tómendeıdi.

Biraq Halyqaralyq ekonomıkalyq yntymaqtastyq jáne damý uıymynyń boljamynsha, tumandy Albıonnyń jaǵdaıy bul jyly jaqsara qoımaıtyn memleketterdiń qatarynda.