Ulttyq quryltaıdyń quramynda 117 adam bar
«Endi, Ulttyq quryltaıdyń jumysyn uıymdastyrý máselesine toqtalsam.
Onyń quramynda 117 adam bar. Quryltaıǵa barlyq oblystyń, san túrli salanyń, ár býynnyń ókilderi qatysyp otyr. Biz kópti kórgen el aǵalarynyń aqyl-keńesine júginemiz. Belsendi azamattyq ustanymy bar orta býynnyń tájirıbesin eskeremiz. Jańasha oılaıtyn jastardyń tyń ıdeıalaryn qoldaımyz», - dedi Memleket basshysy Ulytaýdaǵy quryltaıda.
Prezıdenttiń paıymynsha, Quryltaıdyń jumysy sapaly bolýy úshin eldiń joǵyn joqtaıtyn azamattar bas qosýy kerek.
Bizde túrli pikirtalas oryndary bar. Biraq ulttyq quryltaıdyń orny bir bólek. Quryltaı - keń aýqymdy jıyn. Biraq bul jumystyń sapasyna keri áser etpeýi kerek. Otyrystardy muqııat uıymdastyrýymyz qajet. Bul jerde shyn máninde halyqtyń úni estilýge tıis. Kez kelgen adamdy quryltaıǵa qatystyrýǵa bolmaıdy. Jurttyń muń-muqtajyn, talap-tilegin jetkizetin azamattar bas qosýy kerek», - dedi Qasym-Jomart Toqaev.
Aıta keteıik, Prezıdent Ulytaý oblysyndaǵy jumys sapary aıasynda Ulttyq quryltaıdyń alǵashqy otyrysyna qatysyp jatyr.
Keshe Memleket basshysynyń Ulttyq quryltaı qurý týraly Jarlyǵy jarııalandy.
Ulttyq quryltaıdyń qazirgi quramynda Májilis depýtattary men QHA múshelerinen, azamattyq qoǵam men saıası partııa ókilderinen, sarapshylar men óńirlerdegi qoǵamdyq keńes múshelerinen, kásipkerlerden jasaqtalǵan 117 adam bar.
Solardyń bir parasyn atasaq, aqyn Muhtar Shahanov, qazaqtyń tuńǵysh ǵaryshkeri Toqtar Áýbákirov, akademık Asqar Jumadildaev, ekonomıst Jaqsybek Kúlekeev, saıasatker Álıhan Báımenov, jýrnalıst, medıa-menedjer, qoǵam qaıratkeri Ermurat Bápı, Parlamenttiń birneshe shaqyrylymynyń depýtaty Nurtaı Sabılıanov, balýan Dáýlet Turlyhanov, ǵalym-bıotehnolog Kúnsulý Zakarııa, dintanýshy Qaırat Joldybaı, ǵalym Anar Fazyljanova sııaqty esimder bar.
Memlekettik keńesshi Erlan Qarınniń jazbasyna súıensek, keleshekte quryltaı jumysyna qatysýshylar aýystyrylyp otyrýy múmkin.