«Almaty Arena» mańynda 67 mlrd teńgege jol salynady
ALMATY. KAZINFORM – Almaty qalasynyń Alataý aýdanynda, atap aıtqanda Baýyrjan Momyshuly, Móńke bı, Farıza Ońǵarsynova kósheleri men Rysqulov dańǵylynyń qıylysynda jańa joldar salynady.
Joba týraly habarlandyrý memlekettik satyp alý saıtynda jarııalandy. Atalǵan jumystarǵa 67 mlrd teńgeden astam qarajat qarastyrylǵan.
Tapsyrys berýshi — qalalyq qurylys basqarmasy. Tehnıkalyq erekshelikteriniń qujatyna sáıkes, joba «Almaty Arena» mańyndaǵy aýmaqty qamtıdy. Onda kóshe-jol jelisin qurý ǵana emes, sondaı-aq ınjenerlik ınfraqurylymdy keshendi túrde damytý kózdelgen.
Joba aıasynda atqarylatyn jumystar:
- Uzyndyǵy 22,9 shaqyrym bolatyn eki jáne tórt jolaqty jańa joldar salynady. Joldyń eni 7 metrden 15 metrge deıin bolady. Al onyń betki qabaty joǵary júktemege tózimdi asfaltbetonnan tóseledi.
- Jalpy aýdany 120 myń sharshy metrden asatyn trotýarlar men 29 myń sharshy metrge jýyq velojoldar jabdyqtalady.
- 852 sý ótkizý qubyry ornatylyp, nóser kárizi, jergilikti tazartý qurylǵylary, syrtqy jaryqtandyrý jelileri tartylady. Sondaı-aq sýmen jabdyqtaý, sý burý, elektr qýaty, telekommýnıkatsııa jelileri men baǵdarsham nysandary ornatylady.
Bul nysan jaýapkershiligi joǵary deńgeıdegi sanatqa jatqyzylǵan. Al atalǵan aýmaq «Batys qaqpasy» polıortalyǵyn damytý jáne «Almaty Arena» mańyndaǵy jańa turǵyn úılerdi abattandyrý josparynyń bir bóligi retinde qarastyrylyp otyr.
Qurylys jumystaryn 2026 jyldyń ekinshi toqsanynda bastaý josparlanǵan. Jobany iske asyrýdyń jalpy merzimi — 29 aı.
Eske salaıyq, Almatyda burynǵy tramvaı relsteri alynyp jatyr.
