«Ulttyq múdde — birinshi orynda»: Erlan Qarın Toqaevtyń Berlındegi málimdemesine toqtaldy
ASTANA. KAZINFORM — Erlan Qarın Prezıdent Qasym-Jomart Toqaevtyń Berlındegi málimdemesine toqtalyp, ulttyq múdde, turaqtylyq pen beıbitshilik Qazaqstannyń basty basymdyǵy ekenin atap ótti.
— Keshe Berlındegi baspasóz máslıhatynda Memleket basshysy Qasym-Jomart Toqaev elimizdiń júrgizip otyrǵan ishki jáne syrtqy saıasatyna qatysty birqatar suraqqa jaýap berdi. Kóptegen ótkir taqyryptarǵa qatysty óziniń oıyn ashyq jetkizip, elimizdiń ustanyp otyrǵan pozıtsııasyn keńinen túsindirdi. Osy vıdeo sol jıyndaǵy málimdemelerdiń túıindi tujyrymy sııaqty kórinedi. Prezıdent úshin ulttyq múdde birinshi orynda ekenin anyq jetkizdi. Qazaqstannyń damýy úshin eń aldymen qajetti alǵyshart turaqtylyq pen beıbitshilik ekenin aıta otyryp, osy jolda Memleket basshysy retinde bar kúsh-jigerin jumsaıtynyn málimdedi, — delingen jazbada.
Vıtse-prezıdenttiń sózinshe, Prezıdenttiń tulǵalyq bolmysy da, júrgizip otyrǵan saıasaty da osy jaýapta jatyr.
— Sondyqtan, elimizdiń barlyq maqsattarǵa, bolashaq jetistikterge qol jetkizýi úshin turaqtylyq pen beıbitshilik kerek ekenin esten shyǵarmaıyq, — dedi ol.
Erlan Qarın buǵan deıin Mańǵystaýdaǵy qaıǵyly oqıǵadan keıin áskerde qandaı ózgerister bolatynyn aıtqan edi.
