Ulttyq qorǵa táýelsiz aýdıt júrgiziledi
Ulttyq qordyń ınvestıtsııalyq kirisin anyqtaý úshin táýelsiz aýdıt júrgiziledi. Bul týraly Qarjy vıtse-mınıstri Dáýren Temirbekov aıtty, dep habarlaıdy Kazinform.
«Ulttyq qor - balalarǵa» jobasyn jyl saıyn iske asyrý kezeń-kezeńimen oryndalatyn bolady. Ol úshin eń aldymen ótken jyldyń qorytyndysy boıynsha Ulttyq qorǵa táýelsiz aýdıt júrgiziledi. Aýdıt nátıjesi boıynsha Ulttyq qordyń ınvestıtsııalyq kirisiniń máni men onyń elý paıyzynyń mólsheri anyqtalady», - dedi vıtse-mınıstr Ortalyq kommýnıkatsııalar qyzmetindegi baspasóz máslıhatynda.
Dáýren Temirbekovtiń sózine qaraǵanda, munan keıin Biryńǵaı jınaqtaýshy zeınetaqy qory jyl ishinde dúnıege kelgen, qaıtys bolǵan, azamattyq alǵan jáne azamattyqty joǵaltqan balalar sanyn naqtylaıdy. Derekter tolyqtaı naqtylanǵannan soń Ulttyq bank kámelet jasyna jetken balalarǵa tólem jasaý úshin qajetti somany Biryńǵaı jınaqtaýshy zeınetaqy qoryna aýdarady. Biryńǵaı jınaqtaýshy zeınetaqy qory qarajatty balalardyń maqsatqa saı paıdalanýy úshin ekinshi deńgeıli bankte nemese ulttyq poshta operatorynda ashylǵan shotyna jiberedi.
«Balalar túsken qarajatty óz qalaýynsha eki maqsatta jumsaıdy. Ulttyq qordan beriletin tólemder salyq salýdan bosatylady. Qajetti normalar Salyq kodeksinde jeke kózdelgen», - dedi ol.
