Ulttyq aýyl sharýashylyǵy sanaǵy aıaqtaldy
ASTANA. KAZINFORM — Qazaqstanda 1 tamyzda bastalǵan Ulttyq aýyl sharýashylyǵy sanaǵy aıaqtaldy. Bul sanaq BUU Azyq-túlik jáne aýyl sharýashylyǵy uıymynyń (FAO) aýyl sharýashylyǵy sanaqtarynyń onynshy Dúnıejúzilik baǵdarlamasy aıasynda ótkizildi. Elimiz boıynsha shamamen 1,6 mln úı sharýashylyǵy men 300 myń aýyl sharýashylyǵy nysany qamtyldy.
Sanaqtyń saýalnama paraǵynda jerdi paıdalaný, aýyl sharýashylyǵy tehnıkasynyń bolýy, egis alqaptarynyń kólemi, tyńaıtqysh qoldaný, mal sharýashylyǵy, eńbekpen qamtý jáne basqa da mańyzdy kórsetkishterge qatysty suraqtar qamtyldy. Aqparat iri agrarlyq kásiporyndardan, fermerlik jáne sharýa qojalyqtarynan, sondaı-aq jeke tutyný úshin aýyl sharýashylyǵymen aınalysatyn úı sharýashylyqtarynan jınaldy.
— Ulttyq aýyl sharýashylyǵy sanaǵyna qatysqan, qoldaý kórsetken jáne kómektesken barlyq azamattarǵa shynaıy alǵysymyzdy bildiremiz. Aıta ketý kerek, bul tek derekterdi jınaý boıynsha negizgi kezeńniń aıaqtalýy. Alda bizdi osy derekterdi óńdeý, salystyrý jáne ártúrli deńgeıde biriktirý boıynsha aýqymdy jumys kútip tur. Jınalǵan málimetter agrarlyq salanyń jaı-kúıi týraly obektıvti kórinis qalyptastyrýǵa múmkindik beredi. Aýyl sharýashylyǵynyń damýyna úles qosqan jáne osy mańyzdy isti qoldaǵan ár adamǵa alǵys aıtamyn, — dedi SJRA Ulttyq statıstıka bıýrosynyń basshysy Maqsat Turlybaev.
Derekterdi jınaý eki kezeńmen júrgizildi. Birinshi kezeń 1–31 tamyz aralyǵynda onlaın formatta ótti. Azamattar sanaq.gov.kz saıty arqyly, ETsQ, SMS-kod nemese eGovMobile qosymshasy arqyly QR-kómegimen avtorızatsııalanyp, saýalnama paraǵyn toltyra aldy. Bul múmkindikti shamamen 600 myń respondent paıdalandy.
Ekinshi kezeń 20 qyrkúıekten 20 qazanǵa deıin oflaın formatta ótti. Elimiz boıynsha 3 200-den astam ıntervıýer saýalnama júrgizdi. Árbir ıntervıýerge GPS-navıgatsııa júıesimen jabdyqtalǵan planshet berildi, bul marshrýttardyń ashyqtyǵy men derekterdiń shynaıylyǵyn qamtamasyz etti.
— Bul jumysta ıntervıýerlerdiń eńbegi orasan zor. Olar kún saıyn azamattarmen tikeleı baılanysta bolyp, sanaqtyń maqsatyn túsindirip, mańyzdy derekterdi jınady. Sonymen qatar, negizgi jumystarynda halyqpen jumys isteıtin poshtashylar, áleýmettik qyzmetkerler, kommýnaldyq qyzmet baqylaýshylary da qosymsha tabys tabý múmkindigine ıe boldy. Budan bólek, biz halyqty jumyspen qamtý ortalyqtary arqyly kelgen jumyssyz azamattardy sanaqqa tarttyq, — dedi Bıýro basshysy.
Sanaq aıasynda keń kólemdi aqparattyq kampanııa júrgizildi. Azamattar messendjerler, áleýmettik jeliler men aımaqtyq buqaralyq aqparat quraldary arqyly aldyn ala habardar etildi. Sanaqtyń resmı saıtynda sanaqtan onlaın ótý boıynsha beınenusqaýlyqtar ornalastyryldy, sondaı-aq paıdalanýshylardyń suraqtaryna naqty ýaqyt rejıminde jaýap bergen SANAQ myrza atty chat-bot jumys istedi.
El boıynsha ákimdikter men aýdandyq statıstıka basqarmalarynyń bazasynda sanaqtan óz betimen ótýge arnalǵan 2 684 ózine-ózi qyzmet kórsetý aımaǵy ashyldy. Sondaı-aq búkil kampanııa barysynda 1446 nómiri arqyly jumys istegen Baılanys ortalyǵy 22 myńnan astam ótinishti qabyldady, al SANAQ myrza chat-boty 8,5 myń suraqqa jaýap berdi.
Jınalǵan derekter memleketke agroónerkásip keshenin damytý, aýyldyq jerlerdegi turmys sapasyn arttyrý jáne resýrstardy tıimdi paıdalaný boıynsha neǵurlym dál ári negizdelgen sheshimder qabyldaýǵa múmkindik beredi.
Sanaq nátıjelerin aldyn ala óńdeý jáne taldaý aldaǵy aılarda aıaqtalady. Qorytyndy derekter arnaıy analıtıkalyq quraldarda óńdelip, vızýalızatsııalanyp, keler jyly Bıýronyń resmı saıtynda jarııalanady.
Aıta ketelik 300 myńnan astam sharýashylyqtyń mekenjaıy naqtylanǵan edi.