Ulytaý oblysynda alǵash ret júrekke ashyq ota jasaldy
JEZQAZǴAN. KAZINFORM — «Qazaqmys korporatsııasy» JShS-ǵa tıesili «Jezqazǵan medıtsınalyq ortalyǵy» JShS-da Ulytaý oblysy tarıhynda alǵash ret ashyq júrekke ota jasaldy.
Bul mańyzdy oqıǵa óńirlik medıtsınanyń damýyna serpin berip, turǵyndarǵa elimizdiń iri qalalaryna barmaı-aq joǵary tehnologııalyq kardıohırýrgııalyq kómek alýǵa múmkindik týǵyzdy.
Joba Memleket basshysy Qasym-Jomart Toqaevtyń densaýlyq saqtaý júıesin damytý jónindegi joldaýyna sáıkes keledi jáne eń aldymen azamattarymyzdyń ál-aýqatyn arttyrýǵa baǵyttalǵan.
Eske salsaq, Eske salsaq, Memleket basshysy Medıtsınalyq qyzmetkerler kúnine arnalǵan marapattaý rásiminde sóılegen sózinde densaýlyq saqtaý júıesiniń damýy eń aldymen azamattarymyzdyń ómir sapasyn jaqsartýǵa jáne ál-aýqatyn arttyrýǵa baǵyttalǵanyn erekshe atap ótken edi. Atalmysh joba — Prezıdent jobalaryn tabysty júzege asyrýdyń negizgi mysaldarynyń biri.
Joba «Órkendeý Assıstans» JShS bastamasymen jáne «Qazaqmys» korporatsııasynyń qarjylyq qoldaýymen Ulytaý oblysynyń turǵyndaryna keshendi kardıologııalyq kómek kórsetý baǵdarlamasy aıasynda júzege asyryldy. Osy tektes operatsııalardy jasaý úshin «Jezqazǵan medıtsınalyq ortalyǵy» JShS jansaqtaý bólimshesi qaıta jabdyqtalyp, 650 mln teńgege qajetti jabdyq satyp alyndy.
— Bul qadamdardyń barlyǵy óńirde kardıologııalyq kómekti damytýǵa baǵyttalǵan baǵdarlamanyń bir bóligi bolyp tabylady. Baǵdarlama Ulytaý óńiri turǵyndarynyń densaýlyǵy men ómirin saqtaýdy basty maqsat ete otyryp, aýrýdyń aldyn alý, erte dıagnostıkalaý jáne joǵary tehnologııalyq emsharalardy qamtıdy, — dep atap ótti «Órkendeý Assıstans» JShS dırektory Aıgúl Boranbaeva.
Ota «Jezqazǵan medıtsınalyq ortalyǵy» JShS bazasynda ótti. Bul — «Órkendeý Assıstans» JShS basqarýyndaǵy, Qazaqstannyń jetekshi medıtsınalyq ortalyqtarynyń ondyǵyna kiretin Ulytaý oblysyndaǵy iri jeke menshik medıtsınalyq mekeme.
Jezqazǵan qalasynyń turǵyndary — 60 jastaǵy áıel adam men 52 jastaǵy er adamǵa otany medıtsına ǵylymdarynyń doktory, QR UǴA akademıgi, «Ulttyq ǵylymı kardıohırýrgııa ortalyǵy» AQ basqarma tóraǵasy jáne QR Densaýlyq saqtaý mınıstrliginiń shtattan tys bas kardıohırýrgi, professor ıÝrıı Pıa jasady. ıÝrıı Pıa kardıohırýrgııa salasy boıynsha álemdik deńgeıde moıyndalǵan bilikti maman. Ol jyldar boıy júrekke jasalatyn operatsııalardy álemge úlgi etip kórsetetin deńgeıde abyroımen atqaryp keledi.
— Oblys úshin bul medıtsına salasynda jasalǵan úlken qadam, sebebi buǵan deıin aortokoronarlyq shýnttaý otasy qajet bolǵan naýqastardyń barlyǵy Astana men oblys ortalyqtaryna barýǵa májbúr edi. Bul qadam óńirimizde kardıohırýrgııany damytýǵa jáne ýaqyt óte kele naýqastarǵa tolyqqandy kómek kórsetýge múmkindik beredi. Bizdiń UMC-men yntymaqtastyǵymyz jalǵasady, Astana qalasyndaǵy áriptesterimiz Jezqazǵanǵa naýqastardy emdeý jáne mamandarymyzdy oqytý úshin kelýdi josparlap otyr, — dedi «Jezqazǵan medıtsınalyq ortalyǵy» JShS dırektory Dáýren Amanqulov.
Ortalyq zamanaýı ınfraqurylymmen, joǵary dáldiktegi jabdyqtarmen jabdyqtalǵan. Munda emdelýshilerge kásibı biliktiligi joǵary medıtsınalyq personal qyzmet kórsetedi. Mekeme óńirdegi joǵary tehnologııalyq medıtsınalyq kómek kórsetýge (JTMK) ruqsat beretin Ulttyq akkredıtatsııanyń joǵary sanatyna ıe jalǵyz uıym bolyp sanalady.
Operatsııalardy sátti ótkizgennen keıin ıÝrıı Pıa osyndaı tájirıbeler arqyly óńirlerdegi kardıohırýrgııalyq qyzmetti damytý mańyzdy ekenin atap ótti.
— Geografııalyq turǵydan Jezqazǵan men Ulytaý oblysy Qazaqstannyń júreginde ornalasqan, tarıhy jáne strategııalyq damý turǵysynan da óte mańyzdy orynǵa ıe. Qazir óńirde 220 myńnan astam adam turady, sondyqtan kardıologııa men kardıohırýrgııany damytý oblys úshin aýadaı qajet. 25 jyl buryn salynǵan «Jezqazǵan» medıtsınalyq ortalyǵy barlyq halyqaralyq medıtsınalyq standarttar boıynsha jumys isteıdi. Bizdiń júrek ortalyǵynda basty nazar naýqasqa aýdarylady. Sondyqtan naýqas medıtsınaǵa emes, medıtsına naýqasqa jaqyndaýy kerek. Joǵary bilikti medıtsınalyq kómek adamǵa neǵurlym jaqyn bolsa — Qazaqstan soǵurlym damıdy, — dedi ıÝrıı Pıa.
Densaýlyq saqtaý mınıstrliginiń shtattan tys bas kardıohırýrgi óz sózinde komandasymen birge aldaǵy ýaqytta da Ulytaýǵa ota jasaýǵa jáne áriptesterin oqytýǵa kelýdi josparlap otyrǵanyn aıtty. Ol bastamalardy Astanada ǵana emes, óńirlerde de damytý «Ulttyq ǵylymı kardıohırýrgııa ortalyǵy» AQ-nyń mindeti ekenin atap ótti. Sebebi bul — óz ádistemeleri men tehnologııalaryn búkil elge taratýǵa arnalǵan memlekettik mekeme.
Osyǵan deıin Almatyda birden 24 balaǵa ota jasalǵany jaıly habarlaǵan bolatynbyz.