Ulybrıtanııada FBR-diń analogy qurylady

ASTANA. KAZINFORM — Ulybrıtanııa úkimeti eń aýyr qylmystardy, sonyń ishinde terrorızmdi, uıymdasqan qylmysty jáne alaıaqtyqty tergeıtin jańa kúsh Ulttyq polıtsııa qyzmetin (NPS) qurmaq. Bul týraly ishki ister mınıstri Shabana Mahmýd málimdedi, dep habarlady TASS.

Amerıkanyń Federaldyq tergeý bıýrosynyń (FBR) analogy dep atalǵan jańa agenttik aýyr qylmystarmen kúresý mindetin óz moınyna alady. Bul mindet endi Ulttyq qylmys agenttigine (UQA), aımaqtyq bólimshelerge jáne terrorızm jaǵdaıynda Skotlend-ıArdqa júktelgen.

— Biz «Brıtandyq FBR» dep atalatyn jańa ulttyq polıtsııa qyzmetin quramyz jáne qaýipti qylmyskerlerdi ustaý úshin álemdegi eń myqty kadrlardy jınap, sońǵy tehnologııalardy qoldanamyz. Osynyń arqasynda jergilikti quqyq qorǵaý organdary jergilikti jerlerde qylmyspen kúresýge kóbirek ýaqyt bóle alady, — dedi Shabana Mahmýd.

Mınıstr eldegi qazirgi polıtsııa modeli «ótken ǵasyrǵa arnalǵan» bolǵandyqtan eskirgenin moıyndady.

NPS basshysy Ulybrıtanııadaǵy eń joǵary laýazymdy polıtsııa qyzmetkeri bolady. Ol bet-álpetti avtomatty taný sııaqty ozyq tehnologııalardy el kóleminde engizýge de jaýapty.

Ulttyq polıtsııa basshylary keńesi, Skotlend-ıArd jáne onyń terrorızmge qarsy bólimi birlesken málimdemede jańa organnyń qurylýyn qoldady. Ulybrıtanııanyń Ulttyq qylmys agenttiginiń bas dırektory Greım Bıggar da qoldaý bildirdi. 

— Qylmys, tehnologııa ózgerdi jáne bizdiń áreket etý sharalarymyz da ózgerýi kerek. Qaýipter bárimizge jergilikti deńgeıde áser etip, alaıda ulttyq jáne halyqaralyq jaýapty talap etedi. Mundaı organ bizge halyqty, qoǵamdastyqtarymyzdy jáne elimizdi qorǵaýdyń tıimdiligin arttyrýǵa múmkindik beredi, — dep atap ótti UQA basshysy.

Aıta keteıik, byltyr Ulybrıtanııada jańa áskerı barlaý qyzmeti quryldy.