Ulybrıtanııada dron ıeleri mindetti test tapsyrýǵa tıis
ASTANA. KAZINFORM — Jańa ereje Ulybrıtanııadaǵy jarty mıllıon adamǵa áser etýi múmkin, dep habarlaıdy Kazinform agenttiginiń menshikti tilshisi.
Myńdaǵan brıtandyq Rojdestvo meıramynda dron aldy, alaıda endi jańa ıelerge olardy ushyrmas buryn mindetti teorııalyq test tapsyrý qajet bolady.
1 qańtardan bastap salmaǵy 100 grammnan asatyn drondy nemese avıamodeldi ushyrmaqshy bolǵandardyń barlyǵy Ulybrıtanııa Azamattyq avıatsııa basqarmasynyń onlaın emtıhanynan ótip, dron operatory kýáligin alýǵa mindetti. Buǵan deıin bul talap tek kólemdi qurylǵylarǵa ǵana qoldanylǵan.
Sonymen qatar, 100 grammnan asatyn dron ıeleri avıatsııa basqarmasyna tirkelýi qajet.
Jańa talap Ulybrıtanııa boıynsha shamamen 500 myń adamǵa qatysty bolýy múmkin dep esepteıdi.
Ereje kámeletke tolmaǵandarǵa da qatysty, biraq olardyń jasy eskerilip, ártúrli talap belgilengen. 18 jasqa deıingi jasóspirimder emtıhandy ózdiginen tapsyra alady jáne drondy basqara alady, alaıda olardyń ata-anasy nemese qamqorshysy avıatsııa basqarmasyna tirkelýi tıis.
13 jasqa deıingi balalar da dron operatory kýáligin alýy kerek, biraq test tapsyrý kezinde olardyń janynda eresek adam bolýy qajet. 12 jasqa deıingi balalar tek 16 jastan asqan adamnyń baqylaýymen dron basqara alady, olardyń ata-anasy nemese qamqorshysy da tirkelýi qajet.
Basqarma atap ótkendeı, qajetti qujattarsyz ushý zań buzý bolyp sanalady jáne bul aıyppulǵa nemese aýyr jaǵdaıda qylmystyq jaýapkershilikke ákelýi múmkin.
— Dron kóbine Rojdestvoda syılyqqa beriledi, jańa ereje kúshine engennen keıin barlyq paıdalanýshy tirkelip, dron operatory kýáligin alyp, qaýipsizdik talaptaryn oryndaýy kerek, — dedi avıatsııalyq basqarma ókili Djonatan Nıkolson.
Paıdalanýshylarǵa sondaı-aq ár ushyrýdan buryn áýe keńistigin paıdalaný shekteýlerin tekserý jáne áýejaı men tikushaq qonatyn alańdardan qaýipsiz qashyqtyqty saqtaý usynylady, bul áýe kemeleri úshin qaýip týdyrmaý úshin qajet.
Aıta keteıik, endi drondar men JI zańsyz qurylys nysandaryn anyqtaıdy.