AQSh-tyń jańa baj salyǵy búkil Eýropaǵa soqqy — Merts
ASTANA. KAZINFORM — Germanııa kantsleri Frıdrıh Merts AQSh prezıdenti Donald Tramptyń Eýropalyq Odaqtan ákelinetin avtokólikterge kedendik bajdy arttyrý týraly sheshimi búkil Eýropaǵa jasalǵan soqqy dep sanaıdy. Bul týraly TASS agenttigi jazdy.
Frıdrıh Merts AQSh-tyń jańa ımporttyq baj salyǵyn Germanııaǵa arnaıy baǵyttalǵan shara dep sanamaıtynyn aıtty.
— Ol búkil Eýropaǵa soqqy jasaǵysy keledi, — dedi Germanııa kantsleri ARD telearnasyna bergen suhbatynda.
Sonymen qatar ol AQSh prezıdentiniń azdap kóńili qalǵanyn atap ótti. Sebebi Eýropalyq Odaq 2025 jyldyń tamyzynda kelisilgen saýda kelisimin áli tolyq aıaqtamaǵan. Bul qujatqa qarsy pikirler Eýroparlamentte áli de saqtaýly tur.
Germanııa úkimetiniń basshysy túsindirgendeı, eýropalyq taraptyń únemi jańa talaptar qoıýyna baılanysty Donald Tramptyń shydamy taýsylyp otyr.
— Amerıkalyqtar bárin daıyndap qoıdy, al eýropalyqtar — joq. Sondyqtan biz múmkindiginshe tezirek kelisimge kelýimiz kerek, — dedi Merts.
Buǵan deıin Donald Tramp kelesi aptadan bastap AQSh-qa ákelinetin jeńil avtomobılder men júk kólikterine ımporttyq baj salyǵyn 25%-ǵa deıin kóteretinin málimdegen bolatyn.
