Úkimettiń keńeıtilgen otyrysy bastaldy

ASTANA. KAZINFORM — Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy bastaldy.

Іs-sharada elimizdiń 2024 jylǵy áleýmettik-ekonomıkalyq damýynyń qorytyndylary shyǵarylyp, Úkimettiń aldaǵy kezeńge arnalǵan negizgi mindetteri belgilenedi. 
Byltyrǵy jumystyń qorytyndysyn Premer-Mınıstr Oljas Bektenov, Ulttyq bank tóraǵasy Tımýr Súleımenov jáne birqatar óńirdiń ákimderi baıandaıdy dep josparlanǵan.

Aıta ketý kerek, byltyr 7 aqpanda ótken keńeıtilgen otyrysta Memleket basshysy Úkimettiń aldyna 10 mindet qoıǵan bolatyn. 

Onyń ishinde 2029 jylǵa qaraı ekonomıkanyń kólemin 450 mıllıard dollarǵa jetkizýdi mejesi qoıyldy. Al oǵan qol jetkizý úshin eldiń jalpy ishki ónimi jyl saıyn keminde 6%-ǵa ósýi kerek ekenin basa aıtty. 2024 jyldyń 11 aıyndaǵy qorytyndyǵa súıensek, jalpy ishki ónimniń ósimi 4,4% bolǵan.

Úkimettiń bir jyldaǵy jumysyna Memleket basshysy «Ana tili» gazetine bergen suhbatynda qysqasha baǵa berdi. 

— Úkimettiń mindeti — ekonomıkanyń ósimin qamtamasyz etý jáne azamattardyń ál-aýqatyn jaqsartý. Jalpy alǵanda, Mınıstrler kabıneti bul mindetin oryndap otyr. Ekonomıkany ártaraptandyrý, óńdeý ónerkásibin damytý, ınfraqurylymdy jańǵyrtý sııaqty baǵyttar boıynsha byltyr atqarylǵan jumystyń nátıjeleri jaman emes. Alaıda bári minsiz deýge kelmeıdi, problemalar da bar. Men mınıstrlerden neǵurlym tıimdi jumys isteýdi jáne sheshim qabyldaǵanda batyl bolýdy únemi talap etemin, — degen edi Prezıdent.

Eske salsaq, osyǵan deıin 28 qańtarda Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótetinin jazǵan edik.