Úkimet Ulttyq qordan 2026-2028 jyldary qansha transfert almaq
ASTANA. KAZINFORM — Ulttyq qordy basqarýdan túsetin ınvestıtsııalyq kiris jyl saıyn 0,9-1 trln teńgege ósedi degen boljam bar. Tolyǵyraq Ulttyq bank tóraǵasy Tımýr Súleımenov aıtyp berdi.
— Áleýmettik-ekonomıkalyq damý boljamynyń basty erekshelikteriniń biri — bıýdjet parametrleri men Ulttyq qordan alynatyn qarajat kólemi bıýdjettik jańa qaǵıdalarǵa tolyqtaı sáıkes qalyptasty. Ulttyq qordan alynatyn jyl saıynǵy kepildendirilgen transfert kólemi 2026-2028 jyldarǵa 2,8 trln teńge deńgeıinde josparlanǵan. Sońǵy eki jylmen salystyrǵanda eki ese tómen. Bul tarazylanǵan fıskaldyq saıasattyń kórinisi. Endi osy qaǵıdatty iske asyrýymyz qajet, — dedi Tımýr Súleımenov Úkimet otyrysnyda.
Ulttyq bank basshysy aıtqan josparǵa sáıkes, Ulttyq qordy basqarýdan túsetin ınvestıtsııalyq kiris jyl saıyn 0,9-1 trln teńgege ósedi degen boljam bar.
— Aktıvterdi basqarý strategııasyn jetildire otyryp, ınvestıtsııalyq kiristi arttyrýdy josparlap otyr, ıaǵnı kiris úlesin odan ári ulǵaıtýdy kózdeımiz. Jalpy, bıýdjet parametri men bıýdjet qaǵıdasyn saqtaı otyryp, konsolıdatsııasyn qoldaımyz. Salyq reformasymen qatar qabyldanyp jatqan sharalar bıýdjettiń turaqtylyǵyn arttyryp, fıskaldyq jáne monetarlyq saıasattyń úılesimin jaqsartady ári dezınflıatsııalyq áser beredi, — dep sendirip otyr T. Súleımenov.
Eske sala ketsek, Joǵary aýdıtorlyq palata tóraǵasy Álıhan Smaıylov salyq óndirýdiń tómendeýi Ulttyq qordan alynatyn transfertti kóbeıtýge májbúrlep otyrǵanyn málim etken edi.
Al Úkimet basshysy memlekettik bıýdjet shyǵynyn qatań baqylaýda ustaýdy tapsyrdy.