Belgııada Dımash Qudaıbergenniń shyǵarmashylyǵyna arnalǵan arnaıy radıobaǵdarlama efırge shyqty
ASTANA. KAZINFORM — «Mcsradio Aywaille» radıosynda ótken habarda ártistiń óner joly keńinen tanystyrylyp, Qazaqstannyń mádenıeti men qazirgi kelbeti de nasıhattaldy, dep jazdy Kazinform agenttiginiń Brıýsseldegi menshikti tilshisi.
Baǵdarlamany júrgizýshiler Krıstıan Fıle men Nıkkı uıymdastyryp, efırge Qazaqstannyń Belgııadaǵy elshiliginiń dıplomaty Rahat Nurǵalıev, KU Leuven ýnıversıtetiniń stýdenti Islambek Sman, dombyra úırenip júrgen belgııalyq jas Lýkas Mommer, sondaı-aq Dimash fan-klýbynyń músheleri Ann De Graaf pen Vendı Mrazek qatysty.
Efır Dımashtyń oryndaýyndaǵy Qazaqstan Respýblıkasynyń Memlekettik Ánuranymen bastalyp, jalpy sany 16 áni shyrqaldy. Baǵdarlama barysynda ánshiniń shyǵarmashylyq joly, erekshe vokaldyq dıapazony men halyqaralyq deńgeıdegi jetistikteri keńinen aıtyldy.
Sonymen qatar tyńdarmandarǵa Qazaqstan týraly da málimet berilip, memlekettik týynyń sımvolıkasy men dombyranyń tarıhy men mańyzy tanystyryldy. El baı mádenı murasy bar ári qarqyndy damyp kele jatqan memleket retinde sıpattaldy.
Baǵdarlama aıasynda qazaqstandyq stýdent pen belgııalyq jas dombyrada birneshe kúı oryndap, efırge erekshe mádenı reńk qosty.
Efırge qatysýshylar, sonyń ishinde fan-klýb músheleri men júrgizýshiler, Dımashtyń Belgııada kontsert ótkizýine úmit bildirip, ony uıymdastyrýǵa qoldaý kórsetýge daıyn ekenderin jetkizdi.
Aıta keteıik, «Mcsradio Aywaille» ınternet-radıosynda Dımashtyń ánderi turaqty túrde berilip turady. Alǵashynda eki saǵatqa josparlanǵan baǵdarlama tyńdarmandardyń joǵary qyzyǵýshylyǵyna baılanysty úsh saǵatqa jýyq ýaqytqa sozyldy.
Eske sala keteıik, 1 mamyr – Qazaqstan halqynyń birligi kúnine oraı «Jibek Joly» radıosynyń tikeleı efırinde de arnaıy baǵdarlama júrgizilip, onda Dımashtyń ata-anasy men Meksıka, Polsha jáne Argentınadaǵy jankúıerleri qazaqstandyqtardy quttyqtap, ánshiniń fenomeni halyqaralyq dostyqtyń kópirine aınalǵanyn atap ótti.
