Úkimet Salyq kodeksin engizý jóninde jobalyq keńse qurady

ASTANA. KAZINFORM – Jańa Salyq kodeksin engizý boıynsha jumys turaqty baqylaýda. Bul týraly Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

Mınıstrdiń aıtýynsha, Kodeks qabyldanǵan sátten bastap, júıeli túsindirý jumystary júrgizilip keledi. Barlyq 20 óńirde 130 myńǵa jýyq bıznes ókilderiniń qatysýymen semınar uıymdastyryldy. 1500-ge jýyq suraq túsip, olar boıynsha túsiniktemeler berildi. Turaqty keri baılanys qamtamasyz etilgen.

– Kodekske qol qoıylǵan sátten bastap 1400-ge jýyq ótinish kelip tústi. Onyń ishinde bıylǵy jyl basynan bastap 205 ótinish kelgen. Bıznes suraýlarynyń kópshiligi qoldanbaly negizde, ıaǵnı salyq rejımin tańdaý, uzaq merzimdi sharttardy oryndaý jáne jańa normalardy is júzinde qoldaný máseleleri, – dedi S. Jumanǵarın búgingi Úkimet otyrysynda.

Jumysty jeńildetý maqsatynda Úkimet janynan Salyq kodeksin engizý jáne retteýshi ortany jeńildetý jónindegi jobalyq keńse qurylady. Jobalyq keńse bıznestiń ótinishteri shoǵyrlanatyn, kelisilgen sheshimder qabyldanatyn jáne memlekettiń biryńǵaı ustanymy qalyptasatyn úılestirý núktesine aınalmaq.

– Barlyq syndarly usynystar muqııat qaralyp, qorytyndysy boıynsha túzetýler engizýdiń oryndylyǵy men qajettiligi aıqyndalatyn bolady. Jobalyq keńse Salyq kodeksiniń jańa normalaryna eshqandaı qaıshylyqtar men aqaýsyz, birkelki, boljamdy jáne kelisilgen túrde kóshýdi jáne retteýshi ortany jeńildetýdi qamtamasyz etedi. Josparlaǵan sharalar halyqtyń ál-aýqatynyń artýymen qatar júretin odan ári ornyqty ári sapaly ósý úshin negiz jasaıdy, – dedi Ulttyq ekonomıka mınıstri.

Eske sala ketsek, keshe Prezıdent V Ulttyq quryltaıda Salyq kodeksi – qasıetti jazba emestigin, qajet bolsa, oǵan da ózgeris engizýge bolatynyn aıtqan edi.