Túrkistannan Teriskeıge qonys aýdarýshylar kóp
TÚRKІSTAN. KAZINFORM – Túrkistan oblysynan jyl basynan beri 1 200-ge jýyq azamat soltústikke qonys aýdarǵan. Bul týraly qandastar men qonys aýdarýshylarǵa arnalǵan aqparattyq-túsindirý ortalyǵynyń jetekshisi Ánýar Berdibekuly málimdedi.
Soltústik Qazaqstan oblysyna elimizdiń eńbek kúshi artyq óńirlerinen qonys aýdarýshylardy qabyldaý boıynsha is-sharalar júıeli iske asyp keledi. Máselen bıyl jyl basynan teriskeı óńirge Túrkistan oblysynan 300-ge jýyq otbasy, 1 200-ge tarta azamat qonys aýdarǵan.
«2024 jyly qandastar men qonys aýdarýshylardyń otbasylaryn ornalastyrý úshin tıisti ınfraqurylymy, bos jýmys oryndary men satylymǵa túsken úıleri bar 191 eldi mekenniń tizimi bekitildi. 2023 jyly 2 460 azamat soltústik aımaqtarǵa kóship kelgen», - dedi spıker.
Sondaı-aq «TAUEKEL» uıymynyń jetekshisi Býrahan Daqanov Teriskeıge kóshkisi keletin azamattarǵa úkimet tarapynan qandaı jeńildikter jasalatyny týraly aıtty.
«Qonys aýdarýshylar úshin memleket otbasynyń árbir múshesine 258 440 teńge mólsherinde materıaldyk kómek kórsetedi. Sonymen qatar turǵyn úıdi jaldaý men kommýnaldyq qyzmet shyǵyndaryn óteýge járdem beriledi. Odan bólek, tehnıkalyq jáne kásiptik bilim alý úshin oqytýǵa joldanady. Sondaı-aq jańa turǵylyqty jerinde kásipkerlikti damytýǵa jáne jumysqa ornalasýǵa járdem kórsetiledi. 2023 jyldan bastap kóship kelgen azamattarǵa turǵyn úı satyp alý nemese salý úshin turǵyn úı qunynyń 50 paıyzyn berý kózdelgen», - dedi uıym jetekshisi.
