Túrkistannan Abaı oblysyna kerýen jóneltildi
TÚRKІSTAN. KAZINFORM — Túrkistan oblysynan Abaı oblysyna 540 tonnadan astam aýyl sharýashylyǵy ónimderi tıelgen júk kólikteri jolǵa shyqty, dep habarlaıdy oblys ákimdiginiń baspasóz qyzmeti.
Óńir dıqandary kókónister, baqsha ónimderi, jemister, balyq pen jergilikti qaıta óńdeý ónimderin jóneltti (194 tonna kartop, 81 tonna baqsha ónimderi, 71 tonna jemis-jıdek, 167 tonna sút ónimderi — qymyz, qaımaq, sary maı, qymyz, aıran, irimshik, sondaı-aq bal, shyryn, sýsyn, shujyq ónimderi, jumyrtqa, balyq jáne t. b.).
Túrkistan óńiriniń aýyl sharýashylyǵy taýar óndirýshileri 2–3 tamyz kúnderi Semeı qalasynda ótetin aýyl sharýashylyǵy jármeńkesine qatysady. Onda ónimderin jergilikti turǵyndar men qonaqtarǵa naryqtaǵydan tómen baǵamen usynady. Abaı Qunanbaıulynyń 180 jyldyǵyna arnalǵan jármeńke eki oblys arasyndaǵy ózara yntymaqtastyq týraly kelisim aıasynda ótpek.
Ónim artylǵan kerýendi oblystyq aýyl sharýashylyǵy basqarmasy basshysynyń orynbasary Ermuhammed Quralbekov pen óńirdiń 17 aýdan, qalasynan kelgen jaýapty ókilder shyǵaryp saldy.
— Túrkistan óńirinen Abaı oblysyna jóneltilgen aýyl sharýashylyǵy ónimderi óńiraralyq yntymaqtastyqty arttyryp, baǵany turaqtandyrýǵa, sondaı-aq tutynýshylardy sapaly ári qoljetimdi otandyq ónimmen qamtamasyz etýge yqpal etedi. Bul bastama arqyly jergilikti dıqandar men sharýalardyń eńbegi qoldaý taýyp, halyqqa tıimdi saýda alańy usynylady. Jármeńkege Túrkistan óńiriniń aýyl sharýashylyǵy taýar óndirýshileri atsalysýda, — dedi E.Quralbekov.
Aýqymdy is-shara aıasynda «Túrkistan oblysynyń mádenı kúnderi» atty eki kúndik kontserttik baǵdarlama josparlanyp otyr. Óńirimizdiń taýar óndirýshileri men óner ıeleri Abaı oblysynyń turǵyndary men qonaqtaryn «Arena» mádenı-sport kesheninde asyǵa kútedi.
Túrkistan oblysy — elimizdiń agroónerkásiptik keshen salasyndaǵy jetekshi aımaq. Respýblıka boıynsha jalpy aýyl sharýashylyǵy óniminiń 14,2%-y osy oblysqa tıesili. Bıylǵy jyldyń alǵashqy jartyjyldyǵynda óńirde 253,9 mlrd teńgeniń ónimi óndirilip, naqty kólem ındeksi 104,7%-dy qurady. Negizgi kapıtalǵa 82,3 mlrd teńge ınvestıtsııa tartylǵan. Aýyl sharýashylyǵy daqyldarynyń egis kólemi byltyrǵy jylmen salystyrǵanda 17 myń gektarǵa artyp, 890 myń gektarǵa jetti.