Túrkistanda jasóspirimder balalar oıyn alańyn qıratqan
TÚRKІSTAN. KAZINFORM – Oqıǵa qaladaǵy Otyrar shaǵyn aýdanynda boldy.
Kámeletke tolmaǵan balalardyń oıyn alańyndaǵy qurylǵylardy syndyryp tastaǵan áreketi beınejazbaǵa túsip qalǵan. Polıtsııa qyzmetkerleri júrgizgen tekserý jumystarynyń barysynda qurylǵylarǵa edáýir zııan keltirgen úsh jasóspirim anyqtaldy.
- Tártip saqshylary quqyq buzýshylyq jasaǵan 6-shy synyp oqýshylarynyń ata-analaryna túsindirý jumystaryn júrgizdi. Olarǵa mundaı áreketterge jol bermeý jáne qoǵamdyq oryndarǵa qurmetpen qaraýdyń mańyzdylyǵyn túsindirdi. Qoǵamdyq oryndardy saqtaý – árbir azamattyń paryzy. Qala turǵyndary men qonaqtaryn abattandyrý erejelerin saqtaýǵa, oıyn alańdaryn, oryndyqtar men ózge de nysandardy búldirmeýge, qoqysty arnaıy oryndarǵa tastaýǵa jáne shahardy taza ustaýǵa shaqyramyz, - delingen Túrkistan oblysy polıtsııa departamenti taratqan aqparatta.
Aıta keteıik, budan buryn Almatyda balalar úıinen ketip qalǵan eki qyz izdestirilip jatqanyn jazǵan bolatynbyz.
