Túrkistanda tsıfrlyq formattaǵy ashyq esik kúni ótti
TÚRKІSTAN. KAZINFORM — Ashyq esik kúnine kelgen turǵyndar túrli máselelerin kóterip, quzyrly mamandarǵa saýaldaryn joldady.
Memleket basshysy Qasym-Jomart Toqaev óziniń Joldaýlarynda memlekettik apparattyń basty mindeti — halyqqa sapaly qyzmet kórsetý, azamattardyń quqyǵy men zańdy múddesin qorǵaý ekendigin árdaıym atap ótedi. Prezıdenttiń tapsyrmasyna sáıkes búginde elimizde «Halyq únine qulaq asatyn memleket» tujyrymdamasy júzege asyrylyp, memlekettik organdardyń ashyqtyǵy men qoljetimdiligin arttyrýǵa basymdyq berilip keledi. Ásirese, tsıfrlyq tehnologııalardy engizý arqyly halyqtyń suranysyna jedel ári tıimdi jaýap berý baǵytynda tyń bastamalar qolǵa alynyp jatyr.
Osyǵan oraı, Túrkistan qalasynda Memlekettik qyzmet isteri agenttiginiń Túrkistan oblysy boıynsha departamenti men qala ákimi apparatyna qarasty Azamattardy qabyldaý ortalyǵy birlesip, tsıfrlyq formattaǵy ashyq esik kúnin ótkizdi. Bul shara memlekettik qyzmet kórsetý sapasyn jetildirýge, turǵyndardyń tsıfrlyq saýattylyǵyn arttyrýǵa jáne halyq pen bılik arasyndaǵy senimdi qarym-qatynasty nyǵaıtýǵa baǵyttaldy.
Іs-sharanyń basty maqsaty — azamattarǵa memlekettik qyzmet túrlerin alý barysynda quqyqtary men múmkindikteri týraly keńinen aqparat berý, sondaı-aq áleýmettik mańyzy bar suraqtar boıynsha jan-jaqty qoldaý kórsetý.
Ashyq esik kúnine kelgen turǵyndar túrli máselelerin kóterip, quzyrly mamandarǵa saýaldaryn joldady. Sonyń ishinde eń kóp qoıylǵan suraqtar — turǵyn úı kezegine turý tártibi, jumyssyz retinde tirkelý, ataýly áleýmettik kómekti taǵaıyndaý, áleýmettik tólemder men jeńildikterge qol jetkizý, jer qatynastaryna qatysty quqyqtardy rásimdeý taqyryptaryna qatysty boldy. Barlyq ótinish ıelerine mamandar tarapynan tolyq ári túsinikti jaýaptar berilip, qajetti qujattardy rásimdeýge baılanysty praktıkalyq keńester usynyldy.
Azamattardy qabyldaý ortalyǵy qyzmetkerleriniń aıtýynsha, mundaı formattaǵy is-sharalar turǵyndar úshin asa tıimdi. Óıtkeni kóp jaǵdaıda azamattar memlekettik qyzmetterdi elektrondy portaldar arqyly alý múmkindikterin tolyq bilmeı jatady. Ashyq esik kúni barysynda mamandar elektrondyq úkimet portalyn, mobıldi qosymshalardy paıdalaný joldaryn úıretip, tsıfrlyq qoltańbany qoldaný tártibimen tanystyrdy. Bul óz kezeginde turǵyndardyń zamanaýı tehnologııalardy ıgerýine jol ashyp, ýaqyt únemdeýge múmkindik beredi.
Sonymen qatar, is-shara barysynda turǵyndardyń usynys-pikirleri de nazardan tys qalǵan joq. Jeke qabyldaýlarda aıtylǵan ótinishter júıelenip, tıisti memlekettik organdarǵa joldanatyn bolady. Uıymdastyrýshylardyń aıtýynsha, halyqtyń suranysyna beıimdelgen mundaı kezdesýler memlekettik qyzmetshiler úshin de úlken tájirıbe mektebi sanalady. Óıtkeni qoǵammen betpe-bet pikir almasý arqyly ózekti máselelerdi anyqtap qana qoımaı, ony sheshýdiń tıimdi joldaryn qarastyrýǵa múmkindik týady.
Memlekettik qyzmet isteri agenttiginiń Túrkistan oblysy boıynsha departamenti mundaı sharalardy turaqty túrde ótkizýdi josparlap otyr. Aldaǵy ýaqytta ashyq esik kúnderiniń aýqymyn keńeıtip, aýyldyq jerlerdi de qamtý kózdelýde. Bul — «tsıfrlyq memleket» tujyrymdamasyna saı, halyq pen bılik arasyndaǵy baılanysty odan ári jandandyrýǵa baǵyttalǵan qadam.
Prezıdent Qasym-Jomart Toqaev atap ótkendeı «Halyqtyń senimi — memlekettik organdardyń ashyqtyǵy men aıqyn jumysynyń nátıjesinde qalyptasady. Árbir memlekettik qyzmet azamat úshin qoljetimdi ári túsinikti bolýy tıis». Osy oraıda, Túrkistan qalasynda uıymdastyrylǵan ashyq esik kúni Memleket basshysynyń tapsyrmalaryn iske asyrýdyń naqty kórinisi boldy.
Aıta keteıik, budan buryn Túrkistanda tsıfrlyq tehnologııalar tıimdilikti arttyryp jatqanyn jazǵan bolatynbyz.