Túrkistanda tsıfrlyq ákimdik jumys isteıdi
TÚRKІSTAN. KAZINFORM — Búgingi tańda Túrkistan qalasynda tsıfrlyq transformatsııa men zamanaýı tehnologııalardy engizý baǵytynda aýqymdy jumystar qolǵa alynyp keledi.
Memleket basshysy Qasym-Jomart Toqaev óziniń Joldaýlarynda: «Tsıfrlandyrý — memlekettik basqarýdyń tıimdiligin arttyryp, qoǵammen ashyq dıalog ornatýdyń negizgi tetigi bolýy tıis», — dep atap ótken bolatyn. Bul — el damýyndaǵy strategııalyq baǵdardy bildiretin ustanym.
Osy baǵyttaǵy Túrkistan qalasyndaǵy mańyzdy bastamalardyń biri — turǵyndarmen tikeleı ári jedel baılanys ornatýǵa arnalǵan 109 — Biryńǵaı baılanys ortalyǵy. Bul joba — óńirdegi «ashyq ákimdik» qaǵıdatynyń naqty kórinisi. Túrkistan qalasy men oblys aýmaǵyndaǵy halyqtyń máselelerin jedel sheshý, keri baılanysty kúsheıtý, turǵyndardyń ótinish-tilekterine ýaqytyly jaýap berý — ortalyq jumysynyń basty maqsaty.
Túrkistan oblysynyń tsıfrlandyrý, memlekettik qyzmetter kórsetý jáne arhıvter basqarmasyna qarasty «Tsıfrlyq damý ortalyǵy» KMM janynan qurylǵan 109 bóliminiń tehnıkalyq iske qosylý merzimi — 2022 jyldyń 6 maýsymy bolsa, resmı ashylý kúni — 2022 jyldyń 18 shildesi. Qazirgi tańda bul ortalyq Túrkistan qalasy men oblys aýmaǵynyń halqy úshin táýlik boıy úzdiksiz qyzmet kórsetýde. Zamanaýı baılanys quraldarymen jabdyqtalǵan bólim jergilikti turǵyndar úshin qoljetimdi ári senimdi aqparat kózine aınalyp otyr.
— Ortalyqtyń Túrkistan qalasy boıynsha júrgizgen jartyjyldyq esebine kóz júgirtsek, 2025 jyldyń alty aıynda qala turǵyndarynan 42 951 ótinish kelip túsken. Onyń barlyǵy derlik oryndalǵan. Bul — kún saıyn júzdegen Túrkistan qalasynyń turǵyny túrli másele boıynsha 109 qyzmetine júginetinin bildiredi. Baılanys quraldary boıynsha ótinishterdiń basym bóligi — 42 603 ótinish 109 qysqa nómiri arqyly túsken. Sonymen qatar, WhatsApp jelisi arqyly 315, Telegram bot arqyly 29, Instagram arqyly 2, mobıldi qosymsha arqyly 2 ótinish tirkelgen, — deıdi «Tsıfrlyq damý ortalyǵy» KMM dırektor orynbasary Jansaıa Aıkenova.
Túrkistan qalasynyń turǵyndarynan kelip túsetin ótinishter mazmunyna qaraı birneshe sanatqa jikteledi. Sonyń ishinde 33 527 ótinish keńes berý sıpatynda, 9 401 ótinish naqty oqıǵalar men oqys jaǵdaılarǵa baılanysty tirkelgen. Sonymen birge, 2 aryz, 18 alǵys, 3 usynys kelip túsken.
Ótinishter mazmunyn taldaý arqyly Túrkistan qalasynyń áleýmettik ınfraqurylymynda sheshimin kútken ózekti máseleler de aıqyndalady. Atap aıtqanda, qala turǵyndary elektr jaryǵy boıynsha — 22 562 ret, aýyz sý máselesi boıynsha — 2060 ret, veterınarııalyq qyzmet boıynsha — 1566 ret, kóshe jaryǵy boıynsha — 1200 ret ótinish bildirgen. Sonymen qatar, kógaldandyrý men tal qyrqý (964 ótinish), qoǵamdyq kólik qozǵalysy (807 ótinish), gazben qamtý (756 ótinish), qoqys shyǵarý (661 ótinish), jol ınfraqurylymy (611 ótinish) máseleleri boıynsha da turǵyndar jıi habarlasady. Bul — Túrkistan qalasy úshin eń ózekti salalar ekenin kórsetedi.
Ortalyqtaǵy árbir ótinish avtomatty túrde tirkelip, «Aikey» aqparattyq júıesi arqyly óńdeledi. Bul júıe bes negizgi baǵyt boıynsha jumys isteıdi: operatorlar, ınspektorlar, oryndaýshylar, analıtıkter jáne metodologtar. Jumys protsesterin tehnıkalyq súıemeldeý «TEQ WORLD» kompanııasyna júktelgen. Túrkistan qalasynyń turǵyndary úshin bul — tek baılanys qyzmeti ǵana emes, naqty nátıje men jaýapkershilikke negizdelgen tıimdi qural.
Búginde ortalyqta 41 qyzmetker shtattyq rejımde eńbek etýde. Jalpy, «Tsıfrlyq damý ortalyǵy» KMM quramynda 6 bólim, 82 shtat birligi qarastyrylǵan. Ortalyq qyzmeti turǵyndar úshin tegin jáne táýlik boıy qoljetimdi.
— 109 — Túrkistan qalasy men oblys turǵyndarynyń daýysy bılikke jetetin, másele kóteriletin, sheshim qabyldanatyn naqty alańǵa aınaldy. Árbir ótinishtiń artynda naqty adam, naqty másele, naqty taǵdyr bar ekenin eskersek, bul ortalyqtyń mańyzy orasan. Túrkistan qalasynda turǵyndar belsendiligi men senimi artqan saıyn, 109 qyzmetiniń de áleýeti arta túspek. Jalpy Ortalyq iske qosylǵaly beri oblys kóleminde jalpy sany 638 703 ótinish tirkelgen. Onyń ishinde 619 401 ótinish ýaqytyly oryndalyp, jabylý kórsetkishi 96,9 paıyzdy qurap otyr. Al 2025 jyldyń basynan beri 93 347 ótinish qabyldanyp, onyń 91 740-yna der kezinde jaýap berilgen. 349 ótinim oryndalý barysynda. Bul — ortalyqtyń jumys sapasy men tıimdiligin aıǵaqtaıtyn mańyzdy kórsetkish, — deıdi Jansaıa Aıkenova.
Túrkistan qalasyndaǵy 109 — bul tsıfrlyq memleket pen qarapaıym halyq arasyndaǵy tıimdi ári senimdi kópir. Árbir ótinish — turǵynnyń úni. Al bul únge qulaq túrý — bılik pen qoǵam arasyndaǵy ózara senimniń basty kepili.
Búginde Túrkistan qalasy «Aqyldy qala» qaǵıdatyna saı damyp keledi. Bul uǵym — tek tehnologııa men tsıfrlandyrý ǵana emes, halyqtyń ómir súrý sapasyn arttyrýdyń keshendi júıesi. 109 Biryńǵaı baılanys ortalyǵy osy qaǵıdatty iske asyratyn negizgi quraldardyń biri retinde turǵyndarmen keri baılanysty jedel, ashyq jáne júıeli júrgizýge jol ashyp otyr. Aqyldy sheshimder — Túrkistannyń keleshegi úshin jasalyp jatqan naqty isterdiń aıǵaǵy.
Aıta keteıik, budan búryn «Aqyldy qala» qaǵıdaty boıynsha Túrkistannyń jańa damý kezeńi bastalǵanyn jazǵan bolatynbyz.