Qazaqstanda zańsyz mıgratsııa arnasy: júk kóligindegi qupııa oryn áshkerelendi
ASTANA. KAZINFORM — Krımınaldyq polıtseıler Pavlodar oblysynda arnaıy operatsııa barysynda memlekettik shekara arqyly zańsyz tranzıt uıymdastyrý áreketiniń jolyn kesti, dep habarlaıdy oblystyq PD baspasóz qyzmeti.
Jedel is-sharalar nátıjesinde Ózbekstan Respýblıkasynyń azamaty ustaldy. Ol óz otandastaryn Reseı Federatsııasy arqyly Qazaqstanǵa zańsyz tasymaldaý shemasyn uıymdastyrǵan.
Qylmystyq jospardy júzege asyrý úshin er adam MAN markaly júk kóligin paıdalanǵan.
Kólikti tekserý kezinde jedel qyzmetkerler adamdardy jasyryn tasymaldaýǵa arnalǵan arnaıy jabdyqtalǵan qupııa oryn tapty.
Kólik tárkilenip, arnaıy turaqqa qoıyldy. Uıymdastyrýshyǵa qatysty tergeý júrgizilip jatyr.
— Zańsyz kóshi-qondy uıymdastyrý faktisi boıynsha, kólik quralyn usyný jáne baılanysty qyzmetter kórsetý arqyly qylmystyq is qozǵaldy. Qazir oqıǵanyń barlyq mán-jaıyn anyqtaýǵa jáne kúdiktiniń basqa da osyndaı qylmystarǵa qatystylyǵyn tekserýge baǵyttalǵan tergeý áreketteri júrgizilip jatyr, — dedi Pavlodar oblysy PD Krımınaldyq polıtsııa basqarmasynyń bastyǵy Jaslan Tanjanov.
Buǵan deıin ShQO-da bıyl zańsyz jumys istegen 180-nen astam sheteldik jaýapqa tartylǵanyn jazdyq.
