Túrkistanda ekinshi ret baýyr transplantatsııasy sátti ótti

ASTANA. KAZINFORM — Túrkistan oblystyq klınıkalyq aýrýhanasynyń bazasynda professor, akademık Bolatbek Baımahanovtyń jetekshiligimen jáne A.Syzǵanov atyndaǵy Ulttyq ǵylymı hırýrgııa ortalyǵynyń joǵary bilikti mamandarynyń qatysýymen aımaqtaǵy ekinshi baýyr transplantatsııasy sátti júzege asty. Bul týraly Densaýlyq saqtaý mınıstrligi jarııalady.

54 jastaǵy naýqasqa baýyr tsırrozy, birinshilik bılıarlyq holangıt, baýyr-jasýshalyq jetkiliksizdik, parenhımatozdy sarǵaıý, óńesh venalarynyń varıkozdy keńeıýi, 2-3 satyly baýyr entsefalopatııasy dıagnozy qoıylǵan.

Naýqas birneshe jyldan beri gastroenterologtyń «D» esebinde turady. Aýrýy astsıtpen, portaldy gıpertenzııamen jáne splenomegalııamen asqynǵan. Uzaq emdeý sharalaryna qaramastan, jaǵdaıynyń nasharlaı berdi. Sondyqtan oǵan baýyr transplantatsııasy qajet boldy.

Oǵan 24 jastaǵy uly óz erkimen donor bolýǵa kelisim berip, tolyq medıtsınalyq tekserýden ótti. Absolıýttik qarsy kórsetilimder anyqtalǵan joq.

— Operatsııa A.Syzǵanov atyndaǵy ulttyq ǵylymı hırýrgııalyq ortalyǵy jáne Túrkistan oblystyq klınıkalyq aýrýhanasynyń birlesken komandasymen ótkizildi, — delingen aqparatta.

Qazirgi ýaqytta naýqas dárigerlerdiń dınamıkalyq baqylaýynda. Otadan keıingi kezeń asqynýsyz ótip jatyr. Transplantatsııalanǵan baýyrdyń qyzmeti birtindep turaqtalyp keledi.

— Bul — Túrkistan oblysynda jasalǵan ekinshi baýyr transplantatsııasy. Bul mańyzdy oqıǵa óńirde transplantologııa salasynyń damýyna jańa serpin berip, joǵary tehnologııalyq medıtsınalyq kómektiń qoljetimdiligin arttyrdy, — dep jazdy mınıstrliktiń baspasóz qyzmeti.

Aıta keteıik, qazir elde 4300-den astam adam, onyń ishinde 121 bala aǵza transplantatsııasyn kútip otyr.