Túrkistan oblysynda trassalarǵa beketter ornatylyp jatyr

TÚRKІSTAN. KAZINFORM – Óńirdegi respýblıkalyq mańyzy bar joldarǵa 5 beket, oblystyq mańyzy bar joldarǵa 2 beket ornatyldy.

Túrkistan oblysy Polıtsııa departamenti men Tótenshe jaǵdaılar departamentiniń qyzmetkerleri respýblıkalyq manyzy bar joldarda táýlik boıy qyzmet atqaryp jatyr. Qazirgi tańda Taraz qalasy baǵytyndaǵy joldar tolyq jabylǵan. Onyń ishinde, «Mashat», «Shaqpaq baba» asýy, Túlkibas jáne Saıram aýdandaryndaǵy ishki joldarda polıtsııa beketi ornatyldy. Sonymen qatar Báıdibek jáne Sozaq aýdandaryndaǵy ishki joldarda kóliktiń barlyq túrine shekteý engizildi.

Avtojoldarda apatty jaǵdaılardy boldyrmaý maqsatynda 40 tehnıka jumyldyrylǵan. Sonymen qatar, joldardy qardan tazartý úshin 192 birlik tehnıka jumys istep jatyr.

- Qazir aýa raıynyń nasharlaýyna baılanysty Sozaq aýdanyndaǵy joldarda qalyp qoıǵan 3 júk avtokóliginen 2 adam, Tólebı aýdanyndaǵy joldarda qalyp qoıǵan 2 jeńil avtokólikten 7 adam qutqaryldy. Qajet bolǵan jaǵdaıda qoldanylatyn 2 trassalyq medıtsınalyq-qutqarý pýnkti bar. Sonymen birge, 11 statsıonarlyq jylytý pýnkti daıyndaldy, 8 jyljymaly jylytý beketi vahtalyq avtobýstardyń negizinde jasaqtaldy,- dedi oblystyq Tótenshe jaǵdaılar departamentiniń Tótenshe jaǵdaılardyń aldyn alý basqarmasynyń bastyǵy Nurlybek Rahymberdıev.

Aıta keteıik, Budan buryn Jetisýda Taldyqorǵan-Kólbaı avtojolyna shekteý qoıylǵanyn jazǵan bolatynbyz.