Túrkistan oblysynda tórt jańa sý qoımasy salynady
TÚRKІSTAN. KAZINFORM – Sý resýrstary jáne ırrıgatsııa mınıstri Nurjan Nurjigitov Ordabasy aýdanynda Túrkistan oblysynyń turǵyndarymen eseptik kezdesý ótkizip, aldaǵy vegetatsııa kezeńiniń turaqty ótýin qamtamasyz etý baǵytynda júzege asyrylyp jatqan jumystar týraly baıandady.
2028 jylǵa deıingi sý salasyn damytý jónindegi keshendi josparǵa sáıkes, Túrkistan oblysynda tórt jańa sý qoımasyn salý kózdelgen. Qazirgi tańda «Báıdibek ata» jáne «Qaraqýyc» sý qoımalarynyń qurylysy aıaqtalýǵa jaqyn. Al «Iqan-sý» jáne «Boraldaı» sý qoımalarynyń jobalaý-smetalyq qujattamasy ázirlenip jatyr.
Sondaı-aq qujatta úsh sý qoımasyn qaıta jańǵyrtý jáne taǵy úsh nysannyń ınjenerlik-tehnıkalyq qorǵanysyn kúsheıtý qarastyrylǵan. Budan bólek, 15 kommýnaldyq sý qoımasyna kúrdeli jóndeý júrgizý jáne 40 gıdrotehnıkalyq nysanǵa keshendi tekserý júrgizý josparlanǵan.
Óńirde ırrıgatsııalyq kanaldardy jóndeý jáne rekonstrýktsııalaý boıynsha tórt joba aıaqtaldy. Sonyń nátıjesinde 24,5 myń gektardan astam sýarmaly jer sýmen qamtamasyz etildi. Al jyl basynan bastap Qazaqstannyń ońtústik oblystarynda 115 kanaldy jańǵyrtý jáne 103 kanaldy avtomattandyrý jumysy bastaldy.
– Sońǵy jyldary biz klımattyń turaqty ózgerý úrdisin aıqyn baıqap júrmiz. Bul aýyl sharýashylyǵyna da, jalpy sý balansyna da eleýli áser etedi. Byltyrǵy vegetatsııa kezeńi agrarlyq sektordyń tıimdiligi sý resýrstaryn qanshalyqty durys jáne jaýapkershilikpen basqarýǵa baılanysty ekenin kórsetti. Bul tek naqty josparlaýdy ǵana emes, sý salasyn damytýdyń júıeli tásilin de talap etedi. Sondyqtan bizdiń jumystyń basym baǵyttarynyń biri - sý sharýashylyǵy ınfraqurylymyn jóndeý jáne jańǵyrtý. Qazirgi ýaqytta júzege asyrylyp jatqan iri jobalar sý paıdalanýdyń tıimdiligin arttyrýǵa jáne sýdyń shyǵynyn azaıtýǵa múmkindik beredi,– dedi Sý resýrstary jáne ırrıgatsııa mınıstri Nurjan Nurjigitov.
Mınıstr sondaı-aq jıynǵa qatysýshylarǵa sharýalardy qoldaý úshin qabyldanǵan sharalardy da eske saldy. Sý únemdeý tehnologııalaryn engizýdi yntalandyrý maqsatynda uńǵymalar burǵylaý, ınfraqurylym júrgizý jáne jabdyq satyp alý shyǵyndaryn óteý úlesi 50%-dan 80%-ǵa deıin ulǵaıtylǵan.
Bul shara nátıjesinde Qazaqstanda sý únemdeý tehnologııalary qoldanylatyn jer kólemi úsh esege artyp, 543,5 myń gektarǵa jetti. Túrkistan oblysynda qosymsha 82 myń gektar jerge zamanaýı sýarý júıeleri engizilip, 124,5 mln tekshe metr sý únemdeldi.
Elimizde ırrıgatsııalyq kondomınıýmdar ınstıtýty zań júzinde bekitildi. Onyń negizgi maqsaty – ırrıgatsııalyq jáne kollektorly-drenajdyq jelilerdi tıisti tehnıkalyq jaǵdaıda ustaý.
Memleket basshysynyń tapsyrmasy aıasynda mınıstrlik Bas prokýratýramen birlesip sýdyń «qara naryǵyn» joıýǵa baǵyttalǵan Jol kartasyn qabyldady. Qujatta sý resýrstaryna aýdıt júrgizý, zańsyz sý alýdyń táýekel aımaqtaryn anyqtaý, qarjyny tekserý, sý únemdeý tehnologııalaryn engizý jáne sybaılas jemqorlyqqa qarsy sharalar qarastyrylǵan.
Kezdesýde Túrkistan oblysynyń turǵyndary ırrıgatsııalyq kanaldardy tazalaý jáne betondaý, bulaqtardy qalpyna keltirý, tik drenaj uńǵymalaryn jóndeý jáne sý únemdeýdi sýbsıdııalaý máseleleri boıynsha suraqtar qoıdy. Mınıstrlik málimetinshe, kezdesýden keıin Nurjan Nurjigitov azamattardy jeke qabyldap, barlyq kóterilgen másele boıynsha naqty tapsyrmalar berdi.