Túrkistan oblysynda adam óltirip, máıitti ózenge tastaǵandar sottaldy

TÚRKІSTAN. KAZINFORM — Túrkistan oblysynyń qylmystyq ister jónindegi mamandandyrylǵan aýdanaralyq sotynda asa aýyr qylmys boıynsha qylmystyq is alqabılerdiń qatysýymen qaraldy.

Bul týraly oblystyq sottyń baspasóz qyzmeti habarlady.

Sottalýshylar Qazaqstan Respýblıkasy Qylmystyq kodeksiniń 125-baby 2-bóligi 1) tarmaǵy (adam urlaý), 126-baptyń 1-bóligi (zańsyz bas bostandyǵynan aıyrý), 99-baptyń 2-bóligi 1), 3), 7) tarmaqtary (kisi óltirý) boıynsha aıyptalǵan.

2024 jylǵy 5 tamyzda túngi ýaqytta eki sottalýshy aldyn ala sóz baılasý arqyly Shardara qalasy mańyndaǵy Syrdarııa ózeniniń jaǵasynda eki azamatqa kúsh qoldanyp, olardy zańsyz bas bostandyǵynan aıyrǵan. Jábirlenýshilerdiń aıaq-qoldary, kózi, aýzy men tynys joldary skotchpen oralǵan. Sot-medıtsınalyq saraptamaǵa sáıkes, olar keýde tusynan aýyr soqqy alyp, sonyń saldarynan oqıǵa ornynda kóz jumǵan. Qylmysty jasyrý maqsatynda máıitter ózenge tastalǵan.
Alqabılerdiń sheshimimen eki aıyptalýshy da kináli dep tanylyp, jasaǵan qylmystarynyń jıyntyǵy boıynsha bas bostandyǵynan aıyrý jazasyna kesildi. Bir sottalýshy 24 jyl 6 aıǵa, ekinshisi 23 jyl merzimge bas bostandyǵynan aıryldy.

— Sot jábirlenýshi taraptyń azamattyq talabyn ishinara qanaǵattandyrdy. Sottalýshylardan ortaq tártipte 30 mıllıon teńge moraldyq zııan jáne 2,4 mıllıon teńge advokattyq qyzmet shyǵyndary óndirildi. Qazirgi ýaqytta úkim zańdy kúshine engen joq, — delingen Túrkistan oblystyq sotynyń baspasóz qyzmeti usynǵan aqparatta.

Aıta keteıik, budan buryn Túrkistan oblysynda tyıym salynǵan dinı materıaldardy taratqan sheteldik 7 jylǵa sottalǵanyn jazǵan bolatynbyz.