Túrkistan oblysynda 588 qonys aýdarýshyǵa «Qandas» mártebesi berildi
TÚRKІSTAN. KAZINFORM – Elge kelýshiler Saryaǵash, Ordabasy, Qazyǵurt, Keles, Saıram, Jetisaı, Túlkibas, Maqtaral, Shardara aýdandary men Arys jáne Túrkistan qalasyna qonystanǵan. Bul týraly oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva málimdedi.
Óńirge jyl basynan beri 339 otbasy, 588 etnıkalyq qazaq qonys aýdarǵan. Onyń 570-i Ózbekstannan bolsa, 10-y Tájikstannan kelgen. Al 3 adam Reseıden kóship kelse, basqa memleketterden 5 adam qonys aýdarǵan. Al osy jyldyń jeti aıynda Túrkistan oblysynan 165 otbasy nemese 599 adam elimizdiń Soltústik aımaqtaryna qonys aýdarǵan.
«Eńbek jáne halyqty áleýmettik qorǵaý mınıstrligi 2024 jylǵa respýblıka boıynsha 7050 kvota bólip, qandastar men qonys aýdarýshylar úshin memlekettik qoldaý kórsetetin 7 oblysty belgiledi. Olardyń ishinde Abaı oblysy, Qaraǵandy oblysy, Qostanaı oblysy, Pavlodar oblysy, Soltústik Qazaqstan oblysy, Ulytaý oblysy, Shyǵys Qazaqstan oblysy bar. Bólingen kvota negizinde Shyǵys Qazaqstan oblysyna 9 otbasy, Qostanaı oblysyna 3 otbasy, Pavlodar oblysyna 78 otbasy, Soltústik Qazaqstan oblysyna 66 otbasy, Qaraǵandy oblysyna 1 otbasy, Abaı oblysyna 6 otbasy, Ulytaý oblysyna 2 otbasy kóshti», - dedi Ásııa Temirbaeva.
Sondaı-aq, spıker, óńirdegi az qamtylǵan azamattardyń tabystaryn arttyrý baǵytynda atqarylyp jatqan jumystarmen tanystyrdy.
«Oblysta kópbalaly otbasylar sany 185 690 nemese respýblıkanyń barlyq kópbalaly analarynyń tórtten bir bóligin quraıdy. Az qamtylǵan azamattardyń tabystaryn arttyrý arqyly kedeılikti tómendetý boıynsha jumystar bıyl da jalǵasyp jatyr. 2024 jylǵa qaraı kedeılik deńgeıin 5,5%-ǵa deıin nemese 2023 jylmen salystyrǵanda 25%-ǵa tómendetýge mejelenip otyr» - dedi basqarma basshysy.
Bıyl óńirdegi 116,2 myń adamdy ataýly áleýmettik kómekpen qamtamasyz etýge bıýdjetten 9,6 mlrd teńge bólingen. Sondaı-aq, kedeılik deńgeıin tómendetý jóninde aýdan, qala ákimderimen memorandýmdar túzilip, ataýly áleýmettik kómek kórsetýdiń 2024 jylǵa toqsan saıynǵy jospary bekitildi.
«Bıyl 1 tamyzǵa deıinge málimetterge súıener bolsaq, 14 160 otbasyǵa nemese 84 860 adamǵa ataýly áleýmettik kómek taǵaıyndalyp, kómek alýshylar sany 19 563 adamǵa tómendedi. Bul maqsatqa 4,1 mlrd teńge jumsaldy. Ótken jyldyń tıisti kezeńimen salystyrǵanda az qamtylǵan azamattardyń sany 61 224 adamǵa nemese 41,9% tómendedi», - dedi Ásııa Temirbaeva.
