Túrkistan oblysynda 139 eldimekende ınternet joq
TÚRKІSTAN. KAZINFORM — Óńirdegi 2 053 379 turǵyny bar 690 aýyldyq eldimeken 3G jáne 4G mobıldi ınternet jelisimen qamtylǵan. Qalǵan 93 855 turǵyny bar 139 eldimekende ınternet múldem joq. Bul týraly Túrkistan oblysynyń tsıfrlandyrý, memlekettik qyzmetter kórsetý jáne arhıvter basqarmasynyń basshysy Marat Aınabekov málimdedi.
«Qoljetimdi ınternet» ulttyq jobasy aıasynda Túrkistan oblysy eldi mekenderin joǵary jyldamdyqty ınternetpen qamtý maqsatynda jol kartasy ázirlengen.
Qazirgi tańda baılanys operatorlary 96 aýyldyq eldimekende jańa bazalyq stantsııa ornatýdy josparlap otyr.
Ol úshin jergilikti ákimdik antenna-machtalyq qurylys jaılaryn anyqtap, elektr jelilerimen qamtamasyz etip berý qajet.
Budan bólek, 113 eldimekende jańa bazalyq stantsııalar ornatylady.
Al, 70 eldimekende bazalyq stantsııalardy jańǵyrtý jumystary júrgizilmek.
«Túrkistan oblysy aýmaǵyndaǵy 829 aýyldyq eldimekenniń 690-ynda 4G jáne 3G mobıldi ınternet jelisi bar. Qalǵan 139 eldi mekenniń 100-i 2G mobıldi baılanys jelisimen qamtylǵan. Al, 39 eldimekende uıaly baılanys múldem joq. Jol kartasy aıasynda halyq sany 250-den joǵary 50 eldimekendi 2024-2025 jyldary ınternet jelisimen qamtý josparlanyp otyr. Qalǵan 89 eldimekende tehnıkalyq múmkindiktiń bolmaýy, antenna-machtalyq qurylys jaılaryn ornatýǵa bıýdjettiń qaralmaýy, halyqtyń az qonystanýy, taýly shalǵaı aýmaqtarda ornalasýy, kommertsııalyq turǵydan tıimsiz bolý sebebinen baılanys operatorlary bazalyq stantsııa ornatýdan bas tartýda», — dedi Marat Aınabekov.
