Prezıdent jasandy ıntellekt salasyndaǵy negizgi memlekettik jobalarǵa toqtaldy
ASTANA. KAZINFORM — Almatyda Prezıdent Qasym-Jomart Toqaevtyń tóraǵalyǵymen Jasandy ıntellektini damytý jónindegi keńestiń ekinshi otyrysy ótti, dep habarlaıdy Aqordanyń baspasóz qyzmeti.
Dúnıejúzilik banktiń málimetinshe, tsıfrlyq ekonomıkanyń álemdik ІJÓ-degi úlesi 15 paıyzdan asqan. Bul jahandyq básekeniń taýar naryǵynan derekqor men standarttar naryǵyna qaraı oıysqanyn anyq kórsetedi.
— Búgingi ózgeristerdiń áserin elimiz áli tolyq sezine qoıǵan joq. Ótken aıda Qazaqstan biryńǵaı kedendik rásimdeý platformasyna ótti. Endi deklaratsııa toltyrý ýaqyty bir mınýttan aspaıdy, qujattardyń basym bóligi avtomatty túrde qaralady. Sonymen qatar Smart Cargo ulttyq logıstıka platformasy jasalyp jatyr. Ol 127 derek kózine tikeleı qosylady. Tuǵyrnama adal jumys isteıtin kompanııalarǵa shekaradan tez arada ótýge múmkindik beredi. Salyq salasynda da túbegeıli ózgerister oryn aldy. Salyqtyq ákimshilendirýdiń birtutas júıesi qujattardy óńdeý ýaqytyn bir saǵattan bir mınýtqa deıin qysqartyp, eki mıllıon salyq tóleýshiniń servısti paıdalanýyn jeńildetti. Smart Data Finance platformasynyń iske qosylýy — eleýli jetistikterdiń biri. Júıe mobıldi aýdarymdardan bastap ushaqpen saparlaýǵa deıingi áreketterdiń bárin qamtıtyn 78 derekkózden analıtıkalyq málimet jınaıdy. Bıýdjetke onlaın-monıtorıng jasaý júzdegen mıllıard teńge táýekeli bar tólemderdiń aldyn alady. Ulttyq taýarlar katalogyna 23 mıllıonnan astam ónim túri engizildi. Osy arqyly memlekettik satyp alýlardyń boljamdyq-taldamalyq modeli jasalyp, jyl saıyn 200 mıllıard teńgeden astam qarjyny únemdeýge bolady, — dedi Memleket basshysy.
Budan buryn Memleket basshysy jıynda sóılegen sózinde álem tehnologııalyq transformatsııanyń múldem jańa kezeńine qadam basqanyna nazar aýdardy.
Toqaev atap ótkendeı, memlekettik derekterdiń biryńǵaı júıesi bolmasa, jasandy ıntellektiden paıda joq.
