Túrkistan oblysy jylytý maýsymyna daıyn ba

TÚRKІSTAN. KAZINFORM – Óńirdegi ortalyqtandyrylǵan jylý jelileriniń 49 paıyzy tozǵan. 

Túrkistan oblysy energetıka jáne turǵyn úı-kommýnaldyq sharýashylyq basqarmasy usynǵan aqparatqa súıensek, óńirdegi bıylǵy jylytý maýsymyna daıyndyq jumystary mamyr aıynan bastalǵan. Búgingi tańda oblys kóleminde 36 jylý energetıka kesheni, 2083 avtonomdy qazandyq, 685 densaýlyq saqtaý, 1297 bilim berý, 211 mádenıet, 73 sport, 7 jumyspen qamtý nysany jáne 737 kópqabatty turǵyn úı qysqy kezeńde turaqty jylýmen qamtamasyz etilýge daıyndyq ústinde.

Kentaý kómirmen, Sozaq mazýtpen...

Oblysta ortalyqtandyrylǵan jylý berý qyzmetin kórsetetin 7 kommýnaldyq kásiporyn bar. Olar «Kentaý Servıs», «Jylý», «Arys jylý», «Saryaǵash Turmys», «Lenger-sý», «Sholaqqorǵan-sý», «Otyrar-jylý» MKK.

Kentaý qalasy – kómir otynymen, Sozaq aýdany – mazýtpen, qalǵan óńirler tabıǵı gazben jylytylady.

Jyl saıyn Kentaý qalasynda jylý jaıy másele bolatyn. Ótken jyly qalada ornalasqan №5 jylý energo ortalyǵyndaǵy 6 qazandyqty qaıta jańǵyrtýǵa qarjy bólinip, onyń beseýinde qaıta qurý jumystary tolyǵymen aıaqtaldy. Nátıjesinde Kentaý qalasy 2024-2025 jylǵy jylytý maýsymynda normatıvke sáıkes jylýmen qamtyldy.

Aıta ketý kerek, №7 qazandyqtyń da qurylys-montajdaý jumystary aıaqtalǵan. Endi aldaǵy jylytý maýsymynda 72 saǵattyq tekserýden ótkiziledi.

Ortalyqtandyrylǵan jylý júıeleriniń 49 paıyzy tozǵan

Oblystaǵy ortalyqtandyrylǵan jylý júıeleriniń uzyndyǵy 293,1 shaqyrym. Sonyń ishinde 143,7 shaqyrymy, ıaǵnı 49 paıyzy tozǵan. Bul máseleni sheshý úshin birneshe iri jobalar qolǵa alynyp otyr.

Máselen, Kentaý qalasyndaǵy 14,5 shaqyrymdy quraıtyn magıstraldyq jylý jelilerin qaıta qurý jáne ishki oramdyq jylý júıesin kezeń-kezeńimen jańartý. Sondaı-aq, Túrkistan qalasy №1-shi jáne №2-shi móltek aýdandaǵy 1,2 shaqyrymdy quraıtyn jylý júıeleriniń kvartalishilik qubyrlaryn rekonstrýktsııalaý.

Búginde merdiger mekemelermen kelisim-sharttar jasalyp, jumystar óndiristik kestege sáıkes júrgizilip jatyr.

Óńirge 600 myń tonnadan astam kómir qajet

Oblystyń jalpy kómir qajettiligi – 607 myń tonna. Onyń ishinde bıýdjettik mekemelerge – 75,7 myń tonna, jeke turǵyndarǵa – 257,7 myń tonna, jylyjaılarǵa – 273,2 myń tonna kómir qajet.

Qazirgi tańda bıýdjettik mekemelerge qajetti kómirdiń 36 paıyzy satyp alynǵan. Jeke turǵyndar tarapynan qajettiliktiń tek 10 paıyzy qana oryndalǵan. Kommýnaldyq-turmystyq kómir tasymaldaýmen oblysta 28 óńirlik operatorlar aınalysady. Qoımalarda shamamen 100 myń tonna kómir qory bar. Onyń baǵasy 19 850 – 22 000 teńge aralyǵynda.

Aıta ketetin jaıt, gazdandyrý jumystarynyń qarqyndy júrýine baılanysty turǵyndardyń kómirge suranysy ótken jylmen salystyrǵanda 33 paıyzǵa tómendegen. Sonymen qatar, aýdan-qalalyq ákimdikter turǵyndardy kómirmen qamtamasyz etý jóninde aqparattyq-túsindirme jumystaryn belsendi júrgizilip keledi.

Eske sala keteıik, budan buryn Túrkistan oblysyna 600 myń tonnadan astam kómir qajet ekendigin jazǵan bolatynbyz.