Túrkistan mektepterine «aqyldy» júıe engizilip jatyr
TÚRKІSTAN. KAZINFORM – Tyń joba alǵash bolyp №28 mektep-lıtseıinde iske asty.
Memleket basshysy Qasym-Jomart Toqaev bıylǵy Joldaýynda:
«Bilim berý salasynda tsıfrlyq tehnologııany tıimdi paıdalaný – balalardyń sapaly bilim alýyna kepildik beredi. Memlekettik basqarýdaǵy ashyqtyq pen eseptilik prıntsıpteri mektepterde de ornyǵýy tıis», - dep atap ótken bolatyn.
Prezıdenttiń bul tapsyrmasy elimizdegi bilim berý júıesin ádiletti qoǵam qaǵıdattaryna beıimdeýdi kózdeıdi. Osy oraıda Túrkistan qalasyndaǵy mektepterge engizilip jatqan tsıfrlyq bastamalar Joldaýda júktelgen mindetterdi jergilikti deńgeıde júzege asyrýdyń naqty kórinisine aınaldy.
Búginde Túrkistan qalasynda oqýshylardyń qaýipsizdigin, mekteptegi tártipti jáne ashyq eseptilikti qamtamasyz etý maqsatynda «Alaqan-ashana» jáne «Alaqan-kitaphana» bıometrııalyq aýtentıfıkatsııa júıesi engizilip jatyr. Joba alǵash bolyp №28 mektep-lıtseıinde pılottyq rejımde júzege asyryldy. Bul – tsıfrlyq transformatsııany bilim berý salasyna tıimdi beıimdeýdiń bir úlgisi.
«Alaqan» jobasy oqýshynyń alaqany arqyly onyń jeke basyn naqty sáıkestendirip, mektepke kirý jáne shyǵý ýaqytyn avtomatty túrde tirkeıdi. Mundaı júıe arqyly ata-analar balalarynyń mektepke naqty ýaqytta barǵanyn nemese shyqqanyn mobıldi qosymsha arqyly baqylaı alady. Bul – ata-analar men mektep arasyndaǵy baılanysty nyǵaıtyp, senim men jaýapkershilikti kúsheıtetin tetik.
Sonymen qatar joba aıasynda bastaýysh synyp oqýshylary men áleýmettik osal sanatqa jatatyn balalarǵa arnalǵan tegin tamaqtaný júıesi de avtomattandyrylǵan. Oqýshy alaqanyn qoıǵanda, ol ashanada tirkelip, arnaıy júıe arqyly onyń tamaqtanǵany jáne qandaı taǵam alǵany tirkelip otyrady. Bul áleýmettik ádilettilikti qamtamasyz etip, artyq shyǵynnyń aldyn alady.
Prezıdent óz sózinde:
«Áleýmettik qoldaýǵa bólingen qarajat naqty muqtaj azamattarǵa jetýi tıis. Bıýdjet qarajatynyń ár tıynyna esep bolýy qajet», - degen bolatyn.
Mektep ashanalaryndaǵy tsıfrlyq baqylaý júıesi osy talapty naqty iske asyrady. Al «Alaqan-kitaphana» júıesi – mektep kitaphanasyn basqarýdyń jańasha úlgisi. Bul júıe kitap qoryn tsıfrlyq negizde basqarýǵa, oqýshy alǵan jáne tapsyrǵan kitaptardy tirkeýge múmkindik beredi. Ár oqýshynyń oqý belsendiligi týraly statıstıka jasalyp, kitaphana jumysynda ashyqtyq pen tártip ornaıdy. Bul óz kezeginde oqýshylardyń kitap oqýǵa degen qyzyǵýshylyǵyn arttyryp, bilim alýǵa yntasyn eseleıdi.
Tsıfrlyq kitaphanalar – keleshektiń talaby. Oqýshy QR-kod arqyly qajetti kitapty izdep taýyp, elektrondy nusqasyn paıdalana alady. Oqýshynyń qandaı janrǵa kóbirek qyzyǵatyny, qandaı kitapty jıi oqıtyny týraly derekter jınalyp, mektep psıhologtary men pedagogterge baǵyt beredi. Bul júıe – bilim sapasyn arttyrýmen qatar, balanyń tulǵalyq damýyn da baqylaýǵa múmkindik beredi.
Jalpy, joba qatysýshylary jańa júıeniń tıimdiligine oń baǵa berýde. Muǵalimder úshin eseptilik avtomattandyrylyp, ýaqyt únemdelse, ata-analar balasynyń tártibi men tamaqtanýyna alańdamaıtyn boldy. Al oqýshylar mektepke kirý, ashanadan tamaq alý, kitaphanaǵa barý barysynda eshbir kartochka ne qujatsyz, tek alaqanyn qoıý arqyly erkin qozǵalady.
Sondaı-aq bul joba – balalardyń qaýipsizdigin arttyrýdyń senimdi tásili. Mektepke bógde adamdardyń kirýine tosqaýyl bolady, oqýshynyń qozǵalysy naqty tirkelip otyrady. Bul – ata-ananyń alańsyzdyǵy men mektep ákimshiliginiń jaýapkershiligin arttyratyn mańyzdy júıe.
Prezıdent Joldaýlarynda aıtylǵandaı, «tsıfrlandyrý – tek tehnıkalyq úderis emes, bul – ádilettilik pen ashyqtyq mádenıetin qalyptastyrý». Osy oraıda Túrkistandaǵy bilim berý mekemelerinde júzege asyp jatqan «Alaqan» jobasy – ádiletti qoǵamǵa bet alǵan memlekettiń naqty qadamy.
Keleshekte bul júıeni Túrkistan qalasynyń ózge de mektepterine engizý kózdelip otyr. Osylaısha, oqýshy qaýipsizdigi, bilim berý sapasy men áleýmettik ádilettilik bir arnada toǵysyp, jańasha bilim berý mádenıeti qalyptaspaq.
Eske sala keteıik, budan buryn «Aqyldy qala» kontseptsııasy retinde Túrkistannyń jańa damý kezeńi bastalǵanyn jazǵan bolatynbyz.