Túrkııada taýdan qulaǵan kóshkin 5 adamnyń ómirin qıyp ketti

NUR-SULTAN. QazAqparat – Túrkııanyń shyǵysynda kóshkin kezinde kem degende bes adam qaza tapty. Bul týraly NTV telearnasy habarlady.

Oqıǵa 4 aqpan keshkisin Van-Bahchesaraı tasjolynda Van provıntsııasynda bolǵan. Jolda qar tazalaıtyn kólik jumys istegen, onyń artynan jolaýshylar mingen avtobýs kele jatqan. Kenetten taýda kóshkin júrip, qar tazalaıtyn tehnıkany kómip qalǵan jáne shaǵyn avtobýsty 40 metrlik jardan qulatyp jibergen.

Aldyn ala derek boıynsha, jolaýshylar kóliginde 10-15 adam bolǵan. Provıntsııa gýbernatory Mehmet Emın Bılmezdiń aıtýynsha, qutqarýshylar tórt jolaýshynyń máıitin tapqan jáne qar úıindisiniń astynan bes adamdy qutqaryp qalǵan.

Bılmez keıinirek taǵy eki adamnyń qutqarylǵanyn, olardyń biri alǵan jaraqatynan kóz jumǵanyn habarlady. Bılik qar astynda taǵy da adamdar bar dep esepteıdi. Qutqarý operatsııasyna 200 adam qatysyp jatyr.

Qar tazalaıtyn kólik júrgizýshisiniń aıtýynsha, avtobýsta balalar bolǵan.