Túrkııada shahta opyrylyp 14 adam jaraqat aldy
ASTANA. KAZINFORM – Túrkııanyń Ankara provıntsııasyndaǵy Beıpazar aýdanynda jer asty kómir shahtasy opyrylyp, 14 jumysshy jaraqat aldy. Bul týraly jergilikti bılikke silteme jasap, Sınhýa jazdy.
Provıntsııanyń gýbernatory Vasıp Shahınniń aıtýynsha, ıntsıdent óndiristik jabdyqtar ornalasqan aımaqta bolǵan. Apat kezinde 29 adam sol jerde jumys jasap jatqany aıtyldy.
— Jaraqat alǵan jumysshylar aýrýhanalarǵa jetkizildi, ekeýiniń jaǵdaıy aýyr, — dep habarlady gýbernator.
Jergilikti BAQ-tyń aıtýynsha, oqıǵa ornyna dereý órt sóndirýshiler, medıtsına mamandary, jandarmerııa, sondaı-aq tabıǵı apattar men tótenshe jaǵdaılardyń saldaryn joıýǵa arnalǵan brıgada jiberildi.
Beıpazar aýdanynyń basshysy Vedat Iylmaz shahtanyń opyrylýyna gaz jarylysy sebep bolýy múmkin ekenin boljap, qajetti saqtyq sharalarynyń qabyldanǵanyn atap ótti.
Oqıǵa boıynsha tergeý júrgizilip jatqanyn Túrkııanyń Energetıka jáne Tabıǵı resýrstar mınıstrligi málim etti.
Eske sala keteıik, buǵan deıin Qazaqstannyń Ulytaý oblysynda shahtada apat bolyp, 7 adam kóz jumǵanyn jazǵan bolatynbyz.