Túrkııada neke azaıyp, ajyrasý kóbeıgen – statıstıka
ASTANA. KAZINFORM – 2025 jyly Túrkııada 552 myń neke tirkelip, 193 myńnan astam jup ajyrasqan, dep habarlaıdy Kazinform agenttiginiń menshikti tilshisi.
Túrkııanyń Statıstıka ınstıtýtynyń (TÜİK) derekterine sáıkes, 2025 jyly elde 552 237 neke qıylǵan. Bul kórsetkish 2024 jylmen salystyrǵanda tómen, ol jyly 569 983 neke tirkelgen edi. Jalpy neke koeffıtsıenti (myń adamǵa shaqqandaǵy neke sany) 6,43%-ǵa deıin azaıǵan.
Sonymen qatar, ajyrasý sany artqan. 2024 jyly 188 963 ajyrasý tirkelse, 2025 jyly bul kórsetkish 193 793-ke jetti. Ajyrasý koeffıtsıenti 2,26%-dy qurady.
Neke jasy ósip keledi
Alǵash ret nekege turý jasy eki jynysta da ulǵaıǵan. 2025 jyly erler alǵash ret orta eseppen 28,5 jasta, áıelder 26 jasta nekege turǵan. Erli-zaıyptylar arasyndaǵy ortasha jas aıyrmashylyǵy 2,5 jyl bolǵan.
Óńirler boıynsha aıyrmashylyq
Eń joǵary neke koeffıtsıenti eldiń ońtústik-shyǵys provıntsııalarynda tirkeldi. Kósh basynda Gazıantep – 7,76%. Odan keıin Osmanıe – 7,68% jáne Shanlyýrfa – 7,5%.
Eń tómen kórsetkish Týndjelıde – 4,18%, sodan soń Gúmıýshhane – 4,58% jáne Ardahan – 4,67% provıntsııalarynda baıqaldy.
Sheteldiktermen neke: Sırııa azamattary alda
2025 jyly sheteldik kúıeý jigittermen 5 347 neke (jalpy sannyń 1%-y), al sheteldik qalyńdyqtarmen 28 646 neke (5,2%) tirkelgen.
Sheteldik kúıeý jigitter arasynda sırııalyqtar birinshi orynda – 20,9%. Odan keıin nemister – 18,8% jáne aýǵanstandyqtar – 5%. Sheteldik qalyńdyqtar arasynda da sırııalyqtar kósh bastap tur – 13,8%. Sosyn Ózbekstan – 13,7% jáne Marokko – 9,6%.
Eń kóp ajyrasý – Izmırde
2025 jyly ajyrasý koeffıtsıenti eń joǵary óńir Izmır bolǵan, 3,28%. Sodan keıin Antalıa – 3,21% jáne Denızlı – 3,14%.
Eń tómen kórsetkish Hakkarıde tirkeldi – 0,51%, Shyrnaq – 0,52% jáne Bıtlıs – 0,63%.
Statıstıkaǵa sáıkes, ajyrasýlardyń 34%-y nekeniń alǵashqy bes jylynda oryn alady, taǵy 20,3%-y alty jyldan on jylǵa deıingi aralyqta tirkeledi.
Aıaqtalǵan ajyrasý protsesteriniń qorytyndysy boıynsha 191 371 balaǵa qatysty qamqorshylyq máselesi sheshilgen. Onyń 74,6%-ynda qamqorshylyq anasyna, 25,4%-ynda ákesine berilgen.
Buǵan deıin Túrkııa turǵyndarynyń basym bóligi ózderin baqyttylar sanatyna jatqyzatyny habarlanǵan bolatyn.