Túrkııada maska satylmaıdy, tek qana tegin taratylady

ANKARA. ANADOLY-QazAqparat - Túrkııada koronavırýs ınfektsııasynyń taralýyna qarsy aldyn alý sharalary kezeń-kezeńimen qabyldanýda. Bul týraly prezıdent Rejep Taıyp Erdoǵannyń otandastaryna jasaǵan teleúndeýinde aıtty, dep habarlaıdy QazAqparat Anadoly agenttigine silteme jasap.

Memleket basshysy Túrkııa bıligi halyqqa medıtsınalyq maskany tegin taratýǵa kiriskenin, al olardyń aqshaǵa satylýyna tyıym salynǵanyn habarlady.

Erdoǵannyń aıtýynsha, Túrkııanyń densaýlyq saqtaý júıesi kún saıyn 20 myńnan astam koronavırýs ınfektsııasyna test júrgize otyryp, «mańyzdy kezeńnen» ótken.

Budan bólek, Erdoǵan Ystanbul áýejaıy aýdanynda ınfektsııa taralmas úshin 1000 tósek-oryndyq taǵy eki aýrýhana bolatynyn málimdedi.

Túrkııa basshysy el úkimeti COVID-19 pandemııasy aıasynda taǵy 2,3 mıllıon otbasyna kómek kórsetý josparyn daıyndap jatqanyn aıtyp ótti.

Ol ótken aptada bastalǵan Ulttyq yntymaqtastyq naýqany kezinde qaıyrymdylyqqa 1,5 mıllıard túrik lırasy jınalǵanyn aıtty.