Túrkııa Prezıdenti Ajar Ǵınııatty marapattady

YSTANBUL. QazAqparat - Densaýlyq saqtaý mınıstri Ajar Ǵınııat Ystanbulda ótip jatqan «Pandemııadan keıin jahandyq densaýlyq saqtaýdy nyǵaıtý» taqyrybyndaǵy Dúnıejúzilik Túrki medıtsınalyq kongresine qatysty, dep habarlaıdy QazAqparat vedomstvonyń baspasóz qyzmetine silteme jasap.

Kongrestiń basty maqsaty – shetelde turatyn jáne densaýlyq saqtaý salasynda qyzmet etip júrgen túrki ǵalymdarynyń, Túrkııadaǵy áriptesteriniń basyn qosý arqyly qatysýshy elderdiń medıtsına ǵylymyn damytý salasyndaǵy bar áleýetin arttyrý.

Forýmnyń ashylýynda Densaýlyq saqtaý mınıstrliginiń basshysy Túrkııa Respýblıkasynyń Prezıdenti Rejep Taıyp Erdoǵan myrzaǵa, túrki memleketteri Uıymynyń Hatshylyǵy men Túrkııa Respýblıkasynyń Densaýlyq saqtaý mınıstrligine kongress jumysyna qatysýǵa shaqyrǵany úshin alǵysyn bildirdi, sondaı-aq túrik halqyn basty ulttyq mereke - Respýblıka kúnimen shyn júrekten quttyqtady.

«Biz Túrki memleketteri uıymynyń alańynda densaýlyq saqtaý salasyndaǵy áriptestikti odan ári nyǵaıtýǵa erekshe mán beremiz. 2021 jyly Ystanbulda ótken Túrki memleketteri uıymyna múshe memleketter basshylarynyń Sammıtinde qabyldanǵan «Túrki kózqarasy 2040» baǵdarlamasy densaýlyq saqtaý máselelerin qamtıdy jáne densaýlyqty saqtaý bizdiń elderimiz úshin basty basymdyqtardyń biri ekenin taǵy bir márte kórsetedi», - dep atap ótti A.Ǵınııat óz sózinde.

Jahandyq koronavırýstyń qoǵamnyń barlyq salalaryna áserin eske sala otyryp, ol densaýlyq saqtaý salasyndaǵy halyqaralyq yntymaqtastyqtyń mańyzyn atap ótti.

«Biz pandemııa kezinde kórsetken seriktesterimizdiń qoldaýyn baǵalaımyz jáne Túrkııaǵa kórsetilgen gýmanıtarlyq kómek úshin alǵys aıtamyz», - dep atap ótti Qazaqstannyń densaýlyq saqtaý mınıstri.

«Elderimizdiń tarıhı damýy, densaýlyq deńgeıi men densaýlyq saqtaý júıesi uqsas. Jumys toptary men bastamalarǵa birigý bizge ortaq máselelerdi sheshýge jáne birlesken maqsattarǵa jetýge múmkindik beredi. Bul kongress jahandyq deńgeıde densaýlyq saqtaýdy nyǵaıtýda mańyzdy ról atqarady, mamandar arasyndaǵy kásibı yntymaqtastyqty keńeıtedi», - dep túıindedi Qazaqstan Densaýlyq saqtaý mınıstrliginiń basshysy.

Kongrestiń basty oqıǵalarynyń biri - Rejep Taıyp Erdoǵan myrzanyń ózi ótkizgen qatysýshy elderdiń densaýlyq saqtaý mınıstrlerine «Medıtsına tarıhyna beıildilik» jáne «Ortaq tarıh» marapattaryn tapsyrý rásimi boldy.

Qazaqstan Respýblıkasy Densaýlyq saqtaý mınıstrliginiń basshysyna Túrkııa Prezıdentiniń qolynan COVID-19 indetimen kúreske qosqan úlesi úshin elimizdiń medıtsınalyq ǵylymı qoǵamdastyǵy men medıtsına qyzmetkerlerine arnalǵan estelik músinshe tabystaldy.

Foto: t.me/DenMinPR