Túrkııa krıptovalıýtalarǵa baqylaýdy kúsheıtedi

ASTANA.KAZINFORM – Túrkııa bıligi zańsyz bás tigý, alaıaqtyq jáne zańsyz aqshanyń shetelge shyǵarylýyn toqtatý maqsatynda tsıfrlyq aktıvterge baqylaýdy kúsheıtip jatyr, dep habarlaıdy Kazinform agenttiginiń menshikti tilshisi. 

Túrkııanyń Qarjy mınıstri Mehmet Shımshek krıptovalıýta platformalary arqyly aqshany jylystatýǵa qarsy baǵyttalǵan jańa erejelerdiń engizilgenin habarlady.

Basty ózgerister mynalardy qamtıdy:

Krıptobırjalarǵa qatań baqylaý. El aýmaǵynda jumys isteıtin barlyq platformalar qarjy kózderi men aýdarym maqsaty týraly aqparatty jınap, tekserýge mindetti. Bul talapty oryndamaǵan jaǵdaıda lıtsenzııadan aıyrylady.

Qarajatty shyǵarý merzimine shekteý. Krıptovalıýtany aýdarý kezinde mindetti kidiris engiziledi: jańa akkaýnttar úshin keminde 72 saǵat, qalǵandary úshin satyp alý nemese qarajattyń túsken ýaqytynan bastap 48 saǵattan erte emes.

Steıblkoınderge lımıt. Dollarǵa baılanǵan krıptovalıýtalarǵa (mysaly, USDT nemese USDC) táýliktik lımıt — $3 000, aılyq lımıt — $50 000 kóleminde belgilendi.

Lımıtten asatyn aýdarym jasaý úshin paıdalanýshy ózi jáne qarajat alýshy týraly tolyq aqparat — aty-jóni, mekenjaıy, týǵan kúni jáne basqa derekterdi usynýy tıis.

Ruqsat etilgen erekshelikter: lıtsenzııalanǵan treıderlerge qoldanylady. Resmı platformalarda jumys isteıtin kásibı paıdalanýshylar men treıderler qarajat kózi rastalǵan jaǵdaıda shekteýsiz operatsııalar júrgize alady.

Mınıstr Shımshektiń aıtýynsha, bul sharalar adal paıdalanýshylarǵa kedergi keltirý maqsatynda emes.

— Biz adal qoldanýshylarǵa tosqaýyl qoıýdy kózdemeımiz. Biraq zańsyz tabysyn jasyrǵysy keletinderge jol bermeýimiz kerek. Bul qarjy júıesin qorǵaýǵa baǵyttalǵan shara, — dedi mınıstr.

Atalǵan talaptar el ekonomıkasynyń turaqtylyǵyn nyǵaıtý, qarjylyq ashyqtyqty kúsheıtý jáne aqshany jylystatýǵa qarsy halyqaralyq standarttarǵa beıimdelý aıasynda qabyldanǵan.

Sonymen qatar, Túrkııa ekonomıkasy birneshe jyldyq joǵary ınflıatsııa men ulttyq valıýtanyń qunsyzdanýynan keıin birtindep teńgerimdi ósý modeline kóshe bastaǵanyn kórsetip otyr.

Buǵan qosa, Túrkııadaǵy data-ortalyqtar naryǵy Parsy shyǵanaǵy elderi men basqa da memleketterden kelip jatqan ınvestıtsııalar aıasynda belsendi damý kezeńine ótti.

Aıta ketelik Túrkııanyń medıtsınalyq týrızm salasyndaǵy tabysy artyp kele jatqany týraly jazǵan edik.