Túrkııa BRIKS-ke qosylýǵa ótinish berdi — Bloomberg
ASTANA. KAZINFORM — Túrkııa bıligi BRIKS-ke qosylý týraly ótinishti birneshe aı buryn bergen, dep jazady TASS Bloomberg agenttigine silteme jasap.
Bloomberg agenttiginiń habarlaýynsha, Túrkııa osylaısha álemdegi yqpalyn kúsheıtýge jáne damýshy eldermen baılanysyn keńeıtýge umtylady. Sonymen qatar, BRIKS-ke degen qyzyǵýshylyq Eýropalyq Odaqqa kirýde ilgerileýdiń bolmaýyna jáne NATO-daǵy odaqtastarmen kelispeýshilikter aıasynda paıda boldy.
Bloomberg agenttiginiń habarlaýynsha, el prezıdenti Rejep Taıyp Erdoǵan Batys geosaıası ortalyq retindegi pozıtsııasyn joǵaltyp jatyr jáne kóppolıarly álemniń túrli oıynshylarymen qarym-qatynasty damytýǵa múddeli dep sanaıdy.
Vedomstvonyń málimetinshe, qaýymdastyqty keńeıtý máselesi qazannyń 22-24-i kúnderi Qazanda ótetin BRIKS sammıtinde qaralýy múmkin.
BRIKS-ti 2006 jyly Brazılııa, Reseı, Úndistan jáne Qytaı qurdy, al Ońtústik Afrıka 2011 jyly qosyldy. 2024 jyldyń 1 qańtarynda Mysyr, Iran, Birikken Arab Ámirlikteri, Saýd Arabııasy jáne Efıopııa toptyń tolyqqandy músheleri boldy. Bıyl qaýymdastyqqa Reseı tóraǵalyq etedi.
Esterińizge sala keteıik, BRIKS quramyna Malaızııa, Ázerbaıjan jáne Palestına da qosylýy múmkin.
Sonymen qatar, buǵan deıin Qytaıdyń Qazaqstannyń BRIKS-ke kirýin qoldaıtyny habarlanǵan bolatyn.
