Túrkistandyq ǵalymdar Elbasy maqalasyn erekshe formatta taldady

TÚRKІSTAN. QazAqparat - El Prezıdenti Nursultan Nazarbaevtyń  «Uly dalanyń jeti qyry» atty maqalasyn Túrkistan jurtshylyǵy óte jyly qabyldady. Óńirdegi Qoja Ahmet ıAsaýı atyndaǵy halyqaralyq qazaq-túrik ýnıversıtetiniń mýzeıinde  erekshe formatta jıyn ótip, onda oqytýshylar men stýdentter, ǵalymdar men sarapshylar bul maqalanyń el sanasyn silkindiretinin atap ótti, dep habarlaıdy QazAqparat tilshisi.

Jıynda oqytýshylar men stýdentter tarıhı jádigerlerdi aralap júrip, pikir almasty. Ýnıversıtet dotsenti Lıazzat Dınasheva Elbasynyń «Uly dalanyń jeti qyry» maqalasynda aıtylǵan dúnıeler osy mýzeıde bar ekenine toqtalyp, kelýshilerdi tarıhı jádigerlermen tanystyrdy. Máselen, Uly dalanyń uly esimderi, tutas Túrki áleminiń ǵulamasy - ıAsaýı babamyz týraly qundy málimetter kópshilikti qyzyqtyratyny sózsiz.

Ýnıversıtet oqytýshylary Elbasynyń Túrkistan qalasyn Túrki áleminiń genezısi retinde damytyp, onyń halyqaralyq arenadaǵy bedelin júıeli túrde kóterý baǵytyndaǵy oılary kıeli shaharǵa tyń serpin beretinin aıtty. Al, «Arhıv-2025» baǵdarlamasy negizinde ýnıversıtettegi zertteý jumystary odan saıyn jandana túspek. 

Maqaladaǵy keleli máselelerdi jeke-jeke taldaǵan qatysýshylar Elbasynyń bul qundy dúnıesi Túrkistan oblysy men Túrkistan qalasyn damytatynyn, ondaǵy bastamalar ǵylym men mádenıettiń damýyna úlken serpin beretinin jetkizdi. Aldaǵy ýaqytta osy irgeli oqý ordasynda ǵylymı zertteýler men qazaq órkenıetin tanytatyn úlken jobalar qolǵa alynady degen jospar bar.