Túrkistanda týrızm qalaı damıdy

NUR-SULTAN. QazAqparat – Túrkistan oblysy týrızmdi damytýda Ózbekstan tájirıbesine arqa súıeıtin bolady Bul týraly búgin Túrkistan oblysynyń ákimi Ómirzaq Shókeev aıtty, dep habarlaıdy QazAqparat tilshisi.

«Іshki týrızmniń barlyq nysany - jekemenshik. Naryqtyq ustanymǵa baılanysty baǵa ózgerip turady. Baǵany tómendetýdiń jalǵyz joly –básekelestik. Bizge týrızmmen aınalysatyn bıznesmenderdi, kásipkerlerdi kóbeıtý qajet. Bul oraıda Ózbekstannyń óte jaqsy tájirıbesi bar. Olar árbir aýylǵa baǵdarlama jasaǵan. Turǵyndar úılerin shaǵyn qonaq úıge aınaldyryp, oǵan zamanaýı reńk bergen. Barlyq qolaıly jaǵdaı jasaǵan, qonaqtarǵa qyzmet kórsetedi. Olarǵa paıyzsyz nesıe beredi, basqa da jeńildikteri bar», - dedi Ómirzaq Shókeev Ortalyq kommýnıkatsııalar qyzmetiniń kóshpeli brıfıngi barysynda.

Osy rette Ómirzaq Shókeev Ózbekstan Premer-Mınıstriniń orynbasarymen tájirıbe bólisý jaıynda sóıleskenin aıtty.

«Bizdiń adamdar ol jaqqa barady. Menińshe, bul tájirıbe oblysymyzda, ásirese tabıǵat múmkindik beretin jerlerde taratýǵa laıyqty», - dedi oblys basshysy.