Turǵyn úı qurylysynyń biryńǵaı operatory jumysyn qashan bastaıdy
9 maýsym kúni Memleket basshysy Qasym-Jomart Toqaev turǵyn úı baǵdarlamalarynyń operatorlaryn qysqartý jónindegi Zańǵa qol qoıdy. Oǵan sáıkes elimizde Turǵyn úı qurylysynyń biryńǵaı operatory qurylady. Zań bıylǵy 1 shildeden bastap qoldanysqa enedi.
Qazirgi tańda, «Báıterek» holdınginiń quramynda Qazaqstannyń turǵyn úı qurylysy salasyn damytýmen aınalysyp jatqan 4 enshiles uıym bar:
- «Qazaqstannyń turǵyn úı qurylys jınaq banki» AQ (QTQJB);
- «Qazaqstan ıpotekalyq kompanııasy» AQ (QIK);
- «Báıterek development» AQ (BD);
- «Turǵyn úı qurylysyna kepildik berý qory» AQ (TQKQ).
Sondaı-aq, «Damý» kásipkerlikti damytý qory» AQ turǵyn úı qurylysymen aınalysatyn kásipkerlerdiń kredıtteri boıynsha sýbsıdııa beredi.
Zańǵa sáıkes, «Báıterek» holdınginiń 3 enshiles uıymy («Turǵyn úı qurylys jınaq bankin» qospaǵanda) Turǵyn úı qurylysynyń biryńǵaı operatoryna biriktiriledi. «Damý» qorynyń qurylys salýshylardy sýbsıdııalaý fýnktsııasy da Biryńǵaı operatorǵa beriledi. Bul rette, «Turǵyn úı qurylys jınaq banki eldegi» turǵyn úı-qurylys jınaq júıesin damytýshy jalǵyz bank retinde halyqqa baspanaǵa jeńildikpen nesıe berý fýnktsııasyn jalǵastyra beredi.
Bastapqy kezeńde Biryńǵaı operator mynadaı fýnktsııalardy júzege asyrady:
- ákimdikterde kezekte turǵandar men «Turǵyn úı qurylys jınaq bankiniń» salymshylary úshin qoljetimdi turǵyn úı qurylysyn qarjylandyrý;
- úleskerlik qurylystyń aıaqtalýyna kepildik berý;
- jeke qurylys salýshylardyń kredıtterin sýbsıdııalaý;
- menshikti ınvestıtsııalyq jobalardy iske asyrý jáne qarjylyq qyzmettiń ózge de túrlerin kórsetý.
«Qazirgi ýaqytta, Indýstrııa jáne ınfraqurylymdyq damý mınıstrligimen birge normatıvtik-quqyqtyq bazany jańa Zańǵa sáıkes beıimdeý jumystaryn júrgizýdemiz. Atalǵan jumys kelesi toqsanda aıaqtalmaqshy. Al qyrkúıek aıynyń sońyna deıin qalǵan korporatıvtik rásimder aıaqtalyp, qujattar ádilet organdaryna jiberiledi.
Biryńǵaı operatordy qurý úshin respýblıkalyq bıýdjetten nemese «Báıterek» holdınginen qosymsha qarajat bólý qajet emes. Qyzmettiń turǵyn úı bóligin ońtaılandyrý ákimshilik shyǵystardy keminde 40%-ǵa astam qysqartýǵa múmkindik beredi. Enshiles kompanııalardyń shtat sany da azaıady. Al basqarý apparaty 3 esedeı qysqarady. Alaıda, elimizdiń ár óńirinde Biryńǵaı operatordyń ókilderi bolady», - dedi «Báıterek» ulttyq basqarýshy holdıngi» AQ Basqarma tóraǵasynyń orynbasary Ánýar Omarqojaev.
Sondaı-aq málim etilgendeı, bıylǵy jyldyń sońyna deıin «Turǵyn úı qurylys jınaq bankiniń» bazasynda «Otbasy banki» qurylady. Ol turǵyn úıdi esepke alýdy, kezekke qoıýdy jáne ony bólýdi bir ortalyqtan júzege asyrady. Ákimdikter baspana kezegi boıynsha tizimdi «Otbasy bankine» berip otyrady.
