Transformatorlar qaýipsizdigine qoıylatyn talaptar belgilenedi
«Joǵary voltty jabdyq qaýipsizdikke úlken zııan tóndirýi múmkin. Atap aıtqanda, elektr oqshaýlaý beriktiginiń tómen deńgeıinde órt qaýipsizdigi, jarylys qaýipsizdigi syndy máseleler bar. Máselen, TJM málimetteri boıynsha, sońǵy 2 jylda elektr jabdyǵynyń janýy tirkelgen júzden astam jaǵdaı oryn aldy. Árıne, olardyń basym bóligi eskirgen jabdyqtarmen jáne durys emes paıdalaný jaǵdaılarymen baılanysty. Biraq ónimniń ózine jáne onyń sáıkestigin baǵalaý rásimine qoıylatyn talaptar bolýy tıis», - dedi komıtet tóraǵasy Qýanysh Elikbaev.
Sáıkestikti baǵalaý nysandary, shemalary men rásimderi (deklaratsııalaý ne sertıfıkattaý), sondaı-aq joǵary voltty jabdyqtyń naqty túrleri bıylǵy jyly tehnıkalyq reglamenttiń mátininde belgilenetin bolady.
«Elimizde transformatorlar, kondensatorlar jáne basqa da joǵary voltty jabdyqtar óndirisi joǵary deńgeıde damyǵan. Qazaqstandyq óndirýshilerdiń jabdyqtary ishki naryqty qamtamasyz etýmen qatar shetelde básekege qabiletti, óziniń barlyq qaýipsizdik talaptaryna, onyń ishinde sheteldik synaq ortalyqtarynda da sáıkestigin sátti rastaıdy. Alaıda, búginde qazaqstandyq tutynýshylar sur qaýipti ımport problemasyna tap bolyp otyr. Azamattyq jáne ónerkásiptik obektilerde qaýipsizdikke qater tóndire otyryp, elimizge qaýipti ónimderdi ákeletin naqty ımporttaýshylardy bilemiz», - dedi Qazaqstannyń elektr mashına jasaý qaýymdastyǵynyń basqarýshy dırektory Ǵalym Bolatov.
Sondaı-aq ol qaýipsizdiktiń mindetti mınımaldy talaptarynyń bolmaýy ýákiletti organdarǵa mundaı jaǵdaılardy anyqtaýǵa jáne tıisti is-sharalar qabyldaýǵa múmkindik bermeıtinin atap ótti. Qazirgi jaǵdaıda Ulttyq tehnıkalyq reglamentti qabyldaý Qazaqstandaǵy ónimniń qaýipsizdigin arttyryp qana qoımaı, naryqty josyqsyz básekelestikten qorǵaıdy.