Jahandyq qaqtyǵystar OA elderi úshin júk tasymaly qunynyń 30%-ǵa deıin ósýine sebep bolyp jatyr - Shavkat Mırzıeev
SAMARQAND. KAZINFORM – Jahandyq qaqtyǵystar Ortalyq Azııa elderi úshin júk tasymaly qunynyń 30%-ǵa deıin ósýine jáne taýardy jetkizý ýaqytynyń birneshe aptaǵa keshigýine sebep bolyp jatyr.
Muny Samarqandta ótip jatqan Azııa damý banki Basqarýshylar keńesiniń 59-shy otyrysynda sóz sóılegen kórshiles eldiń prezıdenti Shavkat Mırzıeev aıtty, dep habarlaıdy Kazinform agenttiginiń menshikti tilshisi is-shara ornynan.
Іs-sharada alǵash bolyp sóz alǵan Ózbekstan basshysy Azııa damý bankimen aradaǵy strategııalyq seriktestiktiń nyǵaıyp kele jatqanyn atap ótip, birneshe máselege toqtaldy.
— Búginde kólik-logıstıkalyq dálizderdiń turaqtylyǵyn qamtamasyz etý eń ózekti máselege aınalyp otyr. Jahandyq qaqtyǵystarǵa baılanysty júk dálizderiniń ózgerýi qazirdiń ózinde Ortalyq Azııa elderi úshin júk tasymaly qunynyń 30 paıyzǵa deıin ósýine jáne taýardy jetkizý ýaqytynyń birneshe aptaǵa keshigýine sebep bolyp jatyr, - dedi Shavkat Mırzıeev.
Osy oraıda ol Shyǵys pen Batysty baılanystyratyn «Qytaı – Qyrǵyzstan – Ózbekstan» temir jol jobasynyń mańyzdylyǵyna nazar aýdardy.
— Bul jańa kólik baǵyty búkil aımaqtyń tranzıttik áleýetin arttyrady. Jetkizý merzimi 10 kúnge deıin qysqarady jáne jylyna 15 mln tonnaǵa deıin júk ótkizýge qaýqarly. Osyǵan baılanysty biz banktiń Ortalyq Azııa óńirlik ekonomıkalyq yntymaqtastyǵy baǵdarlamasy sheńberinde Tsıfrlyq keden jáne logıstıkalyq júıeler alıansyn qurýdy usynamyz. Bul kedendik rásimderdi jeńildetýge, qujat aınalymyn tsıfrlandyrýǵa jáne transshekaralyq júk tasymalyn júıeleýge múmkindik beredi, - dep bastama kóterdi Ózbekstan basshysy.
Munymen birge Shavkat Mırzıeev Azııa damý bankimen birlesip, Ortalyq Azııadaǵy týrızmdi damytý usynysyn aıtty.
— Álemdegi turaqsyzdyqqa baılanysty mıllıondaǵan týrıst qaýipsiz baǵyttardy izdeı bastady. Týrızm salasynda Ortalyq Azııa úlken áleýetke ıe. Biz qajetti ınfraqurylym jasaqtaý, vıza rejımin jeńildetý jáne kólik qatynasyn damytýǵa baǵyttalǵan reformalar júrgize otyryp, osy sektorǵa erekshe nazar aýdardyq. Sondyqtan biz Ortalyq Azııa elderiniń barlyǵyn toǵystyratyn týrıstik baǵyt qurýdy usynamyz. Osy rette biz kórshi memleketterdi jáne Azııa damý bankin osy saladaǵy jobalardy birlesip qarjylandyrýǵa shaqyramyz, - dedi Shavkat Mırzıeev.
Ózbekstan prezıdentiniń sózinshe, atalǵan sektorlarmen qatar, respýblıka sırek kezdesetin mıneraldar óndirisinde de bankpen yntymaqtasýǵa daıyn.
— Bul rette biz Azııa damý bankiniń “Sırek kezdesetin mıneraldan óndiriske” baǵdarlamasyna qosylýǵa nıettimiz. Onyń aıasynda shıkizat óndirýmen ǵana shektelmeı, sondaı-aq qosylǵan quny joǵary daıyn taýar shyǵarýǵa den qoıamyz, - dep túıindedi ol.
Eske salaıyq, bul kúnderi Ózbekstannyń Samarqand qalasynda Azııa damý bankiniń 59-shy otyrysy ótip jatyr. Oǵan álemniń 100-ge tarta elinen kelgen 4 myńnan astam delegat qatysyp jatyr.
Keshe BAQ ókilderine arnalǵan baspasóz maslıhatynda Azııa damý bankiniń prezıdenti Masato Kanda Ortalyq Azııa men Ońtústik Kavkazdyń yntymaqtastyǵy ekonomıkalyq ósimdi qamtamasyz etetin kúshke ıe ekenin aıtqan bolatyn.
