Tramp Qytaıǵa qashan barady
ASTANA. KAZINFORM – 25 tamyz kúni AQSh prezıdenti Donald Tramp jaqyn arada nemese jyl aıaǵyna deıin Qytaıǵa saparlaı barýy múmkin ekenin aıtqan edi. Osyǵan baılanysty Qytaı Syrtqy ister mınıstrligi búgin memleket basshylary deńgeıindegi dıplomatııalyq baılanystardyń Qytaı-AQSh qarym-qatynasynda strategııalyq ról atqaratynyn málimdedi.
Lianhe Zaobao basylymynyń jazýynsha, 26 tamyzda ótke baspasóz máslıhatynda, jýrnalısterdiń biri Tramptyń jaqyn arada nemese jyl sońyna deıin Qytaıǵa barǵym keledi degenin eske salyp, SІM-niń resmı ókili Go Tszıakýnnen «Buǵan Qytaı daıyn ba?» dep surady.
Go Tszıakýn Qytaıdyń AQSh-pen qarym-qatynasyn árqashan ózara qurmet, beıbit qatar ómir súrý jáne ózara tıimdi yntymaqtastyq qaǵıdattary negizinde rettep jáne ilgeriletip kele jatqanyn, sonymen qatar óziniń egemendik, qaýipsizdik jáne damý múddelerin tabandy túrde qorǵaıtynyn atap ótti.
Onyń aıtýynsha, Qytaı AQSh-tan ilgeri qadam jasap, ekijaqty qarym-qatynastyń ornyqty, qalypty jáne turaqty damýyn alǵa jyljytýdy úmit etedi.
- Memleket basshylary deńgeıindegi dıplomatııalyq baılanystar Qytaı-AQSh qarym-qatynasynda almastyrylmaıtyn strategııalyq jetekshilik ról atqarady, Qytaı men AQSh basshylary tyǵyz baılanys pen turaqty árekettestikti jalǵastyryp kele jatyr, - dedi resmı ókil.
RFI agenttiginiń habarlaýynsha, Tramp Vashıngtonda Ońtústik Koreıa Prezıdenti Lı Chje Menmen kezdeskende, BAQ ókilderiniń aldynda QHR tóraǵasy Sı Tszınpınmen jaqynda ótken áńgimesin eske alyp: «Belgili bir ýaqytta, múmkin bıyl nemese jaqyn arada, biz Qytaıǵa saparlaı baratyn shyǵarmyz», – degen.
Tramptyń aıtýynsha ol Qytaımen jaqsy qarym-qatynas ornatýǵa daıyn.
- Olardyń qolynda biraz kózir bar, bizde de óte kúshti kózirler bar. Biraq men olardy paıdalanǵym kelmeıdi. Eger paıdalanatyn bolsam, Qytaıdy kúıretýge jetedi, - dedi AQSh Prezıdenti.
Jyldyń basynda Qytaı men AQSh elderiniń arasy kúrt ýshyqqanmen, sáýir aıynda taraptar ózara qosymsha tarıfter engizgennen keıin jaǵdaıdyń sabasyna túse bastaǵany baıqalady.
Buǵan deıin Qytaı men Ortalyq Azııa elderiniń arasyndaǵy saýdanyń ortasha jyldyq ósimi 10% jetkenin jazǵan bolatynbyz.