Tramp Tesla elektr kóligin satyp aldy

VAShINGTON. KAZINFORM – AQSh prezıdenti kompanııa ıesine ádiletsizdik jasalyp jatqanyn aıtty, dep jazady Anadoly.

AQSh prezıdenti Donald Tramp óziniń keńesshisi ári kompanııanyń bas dırektory Ilon Maskty qoldaý belgisi retinde Tesla kóligin satyp aldy.

Amerıkalyq kóshbasshy Tesla kóligin Aq úıdiń aýlasyna aıdap kirip, kameralar aldynda Maskpen birge sýretke tústi.

Aq úı basshysy ádette kólik júrgizbeıtinin, biraq Maskty qoldaıtynyn bildirý úshin kólik satyp alatynyn atap ótti. 

– Men ony satyp alamyn, óıtkeni bul, eń aldymen jaqsy ónim. Ekinshiden, ol óziniń kúshi men ómirin osyǵan arnady, meniń oıymsha, oǵan ádiletsizdik jasaldy, – dedi AQSh prezıdenti.

Memleket basshysy Tesla dılerlerine qarsy vandalızm aktileri «ishki lańkestik aktileri» retinde jikteletinin jáne jaýaptylardy aýyr zardaby kútip turǵanyn atap ótti.

Tramp Aq úıdiń syrtynda turǵan kólikter arasynan qyzyl Tesla Model S kóligin tańdap alyp, fotoǵa tústi. 

- Ókinishke qaraı, men kólik júrgize almaımyn. Kólik basqarmaǵanyma kóp boldy, maǵan negizi kólik júrgizgen unaıdy. Biraq bul kólik Aq úıde bolady, men qyzmetkerlerime ony paıdalanýǵa ruqsat beremin, – dedi Tramp Aq úı syrtynda jýrnalısterge.

Aıta keteıik, 2 jáne 8 naýryzda AQ- aımaqtaryndaǵy Tesla avtosalondarynyń aldynda demonstratsııalar ótti. Narazylyq aktsııasy kezinde tutqyndaýlar boldy.