Astanada jas jigit tis emdeý kezinde kóz jumdy: DSM túsinikteme berdi
ASTANA. KAZINFORM — Astanada 20 jastaǵy jigit tis emdetýge baryp, qaıtys boldy. Bul jaǵdaı qoǵamda rezonans týdyryp otyr.
Aldyn ala málimetterge qaraǵanda, medıtsınalyq talaptar saqtalmaǵan bolýy múmkin. Bul qanshalyqty ras?
Bul týraly QR DSM Medıtsınalyq jáne farmatsevtıkalyq baqylaý komıteti tóraǵasynyń orynbasary Nurdanat Berkinǵalı Jibek Joly arnasynyń «Búgin LIVE» efırinde aıtty.
— Birinshiden, atalǵan aqparat áleýmettik jelilerde taralyp ketti. Qazirgi ýaqytta tekserý jumystary júrgizilip jatyr. Bizdiń bilýimizshe, qylmystyq is qozǵalǵan. Biraq QR Qylmystyq-protsestik kodeksiniń 201-babyna sáıkes, sotqa deıingi tergep-tekserý derekteri jarııa etilmeıdi. Barlyq qorytyndy tergeý áreketteriniń nátıjeleri boıynsha jasalady. Qazirgi tańda Densaýlyq saqtaý mınıstrligi Medıtsınalyq jáne farmatsevtıkalyq baqylaý komıteti, sondaı-aq quqyq qorǵaý organdary tekserý júrgizip jatyr. Osy tekserý nátıjesinde jaýapkershilik aıqyndalyp, iske qatysy bar árbir tulǵanyń áreketine quqyqtyq baǵa beriledi, — dedi Nurdanat Berkinǵalı.
Spıkerdiń aıtýynsha, tekserý kezinde ruqsat berý qujattary, lıtsenzııanyń bolýy, biliktilik talaptarynyń saqtalýy jáne medıtsınalyq qyzmet kórsetý standarttarynyń oryndalýy qaralady.
— Tekserý qorytyndysy boıynsha qandaı da bir zań buzýshylyqtar anyqtalǵan jaǵdaıda, qoldanystaǵy zańnamaǵa sáıkes tıisti sharalar qabyldanady. Olar ákimshilik nemese ózge de sıpattaǵy sharalar bolýy múmkin. Aldymen tekserýdi tolyq aıaqtap, tıisti baǵasyn berý qajet dep sanaımyn. Tekserý barysynda medıtsına qyzmetkerleriniń daıyndyǵy men materıaldyq-tehnıkalyq qamtamasyz etilý deńgeıi anyqtalady. Jetkiliksizdik anyqtalǵan jaǵdaıda densaýlyq saqtaý basqarmasyna qosymsha oqytý júrgizý jáne qajetti jabdyqtarmen qamtamasyz etý boıynsha usynymdar beriledi, — dedi ol.
Aıta keteıik, bul oqıǵanyń mán-jaıyn buǵan deıin de tolyǵyraq jazǵan edik.
https://kaz.inform.kz/news/astanada-stomatologiyada-20-zhastagi-zhgt-koz-zhumdi-2ff8a001
