Tramp NATO sammıtine qatysý úshin Gaagaǵa keldi

ASTANA. KAZINFORM – Seısenbi kúni kúnniń ekinshi jartysynda AQSh prezıdenti Donald Tramp mingen ushaq Nıderlandtyń Gaaga qalasyndaǵy áýejaıǵa kelip qondy. Aq úı basshysy Soltústik Atlantıkalyq yntymaqtastyq uıymy (NATO) sammıtine qatysady, dep habarlaıdy Kazinform agenttiginiń menshikti tilshisi. 

Nıderlandta NATO-ǵa múshe elderdiń memleket jáne úkimet basshylary eki kúndik sammıtke jınalyp jatyr. Bul jıyn Alıanstyń jańadan taǵaıyndalǵan Bas hatshysy Mark Rıýtte úshin alǵashqy joǵary deńgeıdegi is-shara bolmaq.

Sammıttiń negizgi taqyryptary — múshe elderdiń qorǵanys shyǵyndaryn ulttyq ishki jalpy ónimniń (ІJÓ) 5%-na deıin arttyrý jáne qazirgi jaǵdaıdaǵy NATO-nyń qorǵanys qabiletin kúsheıtý.

Álemdegi eń iri áskerı bloktyń kóshbasshylary Iran tóńiregindegi ahýaldy jáne jalpy Taıaý Shyǵystaǵy jaǵdaıdy da talqylaýy múmkin. Sonymen qatar Gaagaǵa Ýkraına prezıdenti Vladımır Zelenskıı de keldi.

Batys basylymdarynyń jazýynsha, Donald Tramp pen Vladımır Zelenskıı arasynda jeke kezdesý 24 maýsym keshkisin sammıt qonaqtaryna arnalǵan Nıderland koroliniń qabyldaýy kezinde nemese 25 maýsym kúni kúndiz «is-shara sheńberinde» ótýi múmkin.

AQSh prezıdenti Donald Tramptyń ákimshiligi Ýkraınaǵa dástúrli áskerı kómekti qysqartyp, NATO-daǵy odaqtastardyń qorǵanys shyǵyndaryn arttyrýǵa basymdyq berip otyr. Al Eýropalyq odaq elderi men Kanada kelesi jyly Ýkraınaǵa 35 mıllıard eýrodan astam qosymsha áskerı kómek bólýge ýáde bergen.

Aıta ketelik Nıderlandtyń Gaaga qalasynda Soltústik Atlantıkalyq yntymaqtastyq uıymynyń (NATO) sammıti bastalatyny týraly jazǵan edik.